OMBUDSMAN APARATININ ƏMƏKDAŞI ÜMUMRUSİYA ELMİ-PRAKTİK KONFRANSINDA İŞTİRAK ETMİŞDİR
Ombudsman Aparatının elmi-analitik sektorunun müdiri Zaur Əliyev Moskva şəhərində VI Ümumrusiya elmi-praktik konfransında və Rusiya Beynəlxalq Hüquq Assosiasiyasının illik beynəlxalq konfransında bu nüfuzlu assosiasiyanın üzvü kimi iştirak etmişdir.
Aparatdan AZƏRTAC-a bildirmişlər ki, RF Prezidenti yanında Dövlət İdarəçilik Akademiyasında Rusiya Federasiya Şurasının və Hüquq Monitorinq Mərkəzinin təşkilatçılığı ilə keçirilən tədbir “Hüququn monitorinqi RF-nin innovasion inkişaf strategiyasının əsası kimi” mövzusuna həsr edilmişdir. Konfransa RF Prezidenti Administrasiyasının, Federasiya Şurası, Dövlət Duması, RF hökuməti Aparatının əməkdaşları və digər nümayəndələr qatılmışlar.
Z.Əliyev konfransda “Azərbaycan Respublikasının insan hüquqları üzrə müvəkkilinin qanunvericiliyin təkmilləşdirilməsində və monitorinqində rolu” mövzusunda məruzə ilə çıxış etmişdir. O, müvəkkilin elmi-analitik sahədə fəaliyyəti barədə məlumat vermiş, insan hüquqlarının və azadlıqlarının müdafiəsi ilə bağlı ombudsmanın bir çox təkliflərinin qəbul edilmiş müvafiq qanunvericilik aktlarında nəzərə alındığını diqqətə çatdırmışdır.
Bölmənin digər xəbərləri
