OMBUDSMAN BMT-NİN UŞAQ HÜQUQLARI KOMİTƏSİNİN RƏHBƏRİ İLƏ GÖRÜŞMÜŞDÜR
Ombudsman Aparatından AZƏRTAC-a bildirmişlər ki, müvəkkil ölkəmizdə insan hüquqlarının, o cümlədən uşaq hüquqlarının qorunması və təmin edilməsi sahəsində görülmüş işlər barədə qonağa məlumat vermişdir. O, Ermənistanın təcavüzü nəticəsində çadırlarda dünyaya gələn yüz min uşağın insan hüquqlarından məhrum olduğunu bildirmiş, müxtəlif xəstəliklərdən əziyyət çəkən, əlil, yetim, valideyn himayəsindən məhrum uşaqların daim dövlətimizin diqqətində olduğunu, azyaşlı məhkumların hüquqlarının müdafiəsinin müvəkkilin fəaliyyətində mühüm yer tutduğunu qeyd etmişdir.
Ombudsman qonağın təmsil etdiyi qurumla məsləhətləşmələr aparılmasının ölkəmizdə insan, o cümlədən uşaq hüquqlarının daha səmərəli və etibarlı təmin olunmasına kömək göstərəcəyini bildirərək, Y.Doeki qarşılıqlı əməkdaşlığa dəvət etmişdir.
Y.Doek fikir mübadiləsinə və ətraflı məlumata görə təşəkkürünü bildirərək, ombudsmanın insan, həmçinin uşaq hüquqlarının qorunması sahəsində çoxşaxəli fəaliyyətini təqdir etmişdir. O, uşaq hüquqlarının monitorinqinin aparılması üzrə resursların artırılmasını tövsiyə etmiş, gələcək əməkdaşlığın faydalı olacağına ümid bəslədiyini söyləmişdir.
Bölmənin digər xəbərləri
