Ötən ay Qəbələnin otel və mehmanxanaları 5 mindən çox turistə xidmət göstərib
Qəbələ, 20 fevral, Mustafa Dadaşov, AZƏRTAC
Bu ilin yanvarında Qəbələ rayonundakı otel və mehmanxana tipli müəssisələrə 5471 nəfər yerli və əcnəbi turist yerləşdirilib. Onların 3289 nəfəri və ya 60,1 faizi Azərbaycan, 2182 nəfəri və ya 39,9 faizi xarici ölkə vətəndaşı olub.
Bu barədə AZƏRTAC-ın bölgə müxbirinə Qəbələ Rayon Statistika İdarəsindən məlumat verilib.
Bildirilib ki, yanvarda Qəbələnin otel və mehmanxana tipli müəssisələrinə yerləşdirilən yerli turistlərin sayı 2022-ci ilin eyni dövrü ilə müqayisədə 1063 nəfər və ya 24,4 faiz azalsa da, əcnəbi turistlərin sayında 340 nəfər və ya 18,5 dəfə artım qeydə alınıb.
İdarədən verilən məlumata görə, yanvarda Qəbələyə gələn əcnəbi turistlər arasında Birləşmiş Ərəb Əmirliklərinin vətəndaşları üstünlük təşkil edib. Belə ki, ilin birinci ayında bu ölkənin 412 vətəndaşı Qəbələdə olub. Bundan əlavə, yanvarda Qəbələyə Səudiyyə Ərəbistanı, Hindistan, Küveyt, Rusiya, Qətər, Oman, Pakistan, Türkiyə, Qazaxıstan və digər ölkələrdən də xeyli sayda turist gəlib.
Bölmənin digər xəbərləri
