Ötən il ailə və gender məsələləri üzrə institusional tədbirlər gücləndirilib
Bakı, 21 may, AZƏRTAC
Zorakılığın müxtəlif formalarından zərər çəkmiş şəxslərin hüquqlarının müdafiəsi istiqamətində əhəmiyyətli addımlar atılıb. 2024-cü ildə zorakılığa məruz qalan şəxslərə dövlət vəsaiti hesabına hüquqi yardım göstərilib. Bu, zərərçəkənlərin müdafiə mexanizmlərinə çıxış imkanlarının genişləndirilməsi baxımından önəmli hesab olunur.
AZƏRTAC xəbər verir ki, bu sözləri parlamentin Ailə, qadın və uşaq məsələləri komitəsinin sədri Hicran Hüseynova “Ailə, Qadın və Uşaq Problemləri üzrə Dövlət Komitəsinin 2024-cü il üzrə məlumatı”nı şərh edərkən söyləyib.
Komitə sədri əlavə edib ki, ötən il azyaşlıların erkən nikahlarının qarşısının alınması sahəsində də hüquqi mexanizmlər təkmilləşdirilib. Belə ki, nikah yaşının bir ildən az müddətə endirilməsinə icazə verən istisna hal qanunvericilikdən çıxarılıb.
H.Hüseynova cəmiyyətin genetik təhlükəsizliyinin qorunması məqsədilə qəbul edilmiş mühüm qanun yeniliyinə də diqqət çəkib. Xatırladıb ki, qohumlar arasında nikahların qadağan olunmasına dair qanun 2025-ci il iyulun 1-dən etibarən qüvvəyə minəcək. Bu addım, onun fikrincə, Azərbaycan cəmiyyətinin genefondunun sağlam saxlanmasına yönəlmiş strateji qərardır.
Bölmənin digər xəbərləri
