Ötən il Azərbaycanda 130-a yaxın Niderland şirkəti fəaliyyət göstərib
Haaqa, 21 may, AZƏRTAC
Müstəqilliyini bərpa etdikdən sonra keçən 34 ildə Azərbaycan coğrafi üstünlüyü, diplomatik çevikliyi, resursların idarə edilməsi, iqtisadi və hərbi imkanlarına görə orta güc dövlətinə çevrilib. Cənubi Qafqazın ən böyük iqtisadiyyatına malik Azərbaycan region daxilində və onun hüdudlarından kənarda nəqliyyat-enerji layihələrinə irimiqyaslı investisiyalar yatırmaqla yanaşı, həm də bu sahədə aparıcı dövlətdir.
AZƏRTAC xəbər verir ki, bu fikirlər Azərbaycanın Niderlanddakı səfiri Məmməd Əhmədzadənin bu ölkənin “The Holland Times” qəzetinə verdiyi müsahibəsində yer alıb.
Məqalədə qeyd edilib ki, Müstəqillik Gününün hər bir azərbaycanlının qəlbində xüsusi yeri var. 1918-ci il mayın 28-də müsəlman Şərqində ilk dünyəvi demokratik respublika - Azərbaycan Xalq Cümhuriyyəti yaradılıb. Bu Respublika cəmi 23 ay ömür sürsə də, dövlətçiliyimizin əsaslarını, ümumi seçki hüququnu təmin etdi, habelə qadınlara bir çox Avropa ölkələrindən əvvəl səsvermə hüququ verdi. Xalqımız Azərbaycan Xalq Cümhuriyyətinin tarixi irsinə və zəngin dövlətçilik ənənələrinə əsaslanaraq, 1991-ci ildə dövlət müstəqilliyini bərpa etdi. 28 May xalqımızın azadlıq və suverenliyinin rəmzidir. Bu, qürur və müstəqillik uğrunda mübarizə aparanların xatirəsini anmaq və müasir Azərbaycanın nailiyyətlərini qeyd etmək məqamıdır.
Azərbaycanın təbii ehtiyatlarından strateji istifadəyə və böyük enerji infrastrukturu təşəbbüslərindəki roluna görə bir çox ölkə üçün əsas enerji təchizatçısı olduğunu deyən səfir vurğulayıb: “Azərbaycan tərəfindən reallaşdırılmış Bakı-Tbilisi-Ceyhan neft kəməri və Cənub Qaz Dəhlizi Avropanın enerji təhlükəsizliyinin təmin edilməsində mühüm rol oynayır. Azərbaycan və Avropa İttifaqı arasında 2022-ci ildə imzalanmış enerji sahəsində strateji tərəfdaşlığa dair Anlaşma Memorandumu 2027-ci ilə qədər Azərbaycan qazının Avropa İttifaqına ixracının iki dəfə artırılmasını və Avropaya ixrac üçün Azərbaycanda bərpaolunan enerji mənbələrindən elektrik enerjisinin istehsalını nəzərdə tutur. Biz Avropaya qaz ixracımızı ardıcıl olaraq artırmışıq və hazırda on Avropa ölkəsini qazla təmin edirik. Azərbaycanın bərpaolunan enerji mərkəzi olmaq üçün də böyük potensialı var. Biz Gürcüstan, Rumıniya və Macarıstanla birlikdə Xəzər dənizindən elektrik enerjisinin Avropaya ötürülməsi üçün Yaşıl Enerji Dəhlizini inkişaf etdiririk. Həmçinin Mərkəzi Asiyadan olan tərəfdaşlar - Qazaxıstan və Özbəkistanla da onları bu layihəyə cəlb etmək istiqamətində çalışırıq. 2024-cü ilin noyabrında Azərbaycan Bakı Maliyyə Məqsədi, karbon bazarları üçün çərçivə və İtki və Zərər Fondunun fəaliyyətə başlaması kimi tarixi nəticələrə nail olmaqla, COP29-a uğurla ev sahibliyi etdi. Bütün bu səylər göstərir ki, Azərbaycan təkcə ənənəvi enerji təchizatçısı deyil, həm də Avropa və onun hüdudlarından kənarda təhlükəsiz, şaxələndirilmiş və davamlı enerji gələcəyinə sadiq olan gələcəyə yönəlmiş tərəfdaşdır”.
İki ölkə arasında diplomatik münasibətlərə də toxunan diplomat bildirib ki, Niderlanddakı Azərbaycan icması ölkələri birləşdirən körpü rolunu oynayır. Münasibətlərin daha da inkişaf etdirilməsi üçün böyük potensial var. “Hesab edirəm ki, Niderlandda bu potensial - Azərbaycanın həqiqətləri, onun Cənubi Qafqazdakı liderliyi və Xəzər hövzəsindəki açar rolu və daha geniş regiona, o cümlədən Mərkəzi Asiyaya qapı kimi strateji mövqeyi haqqında məlumatlılıq məhduddur. Bundan əlavə, keçmiş Ermənistan-Azərbaycan münaqişəsi və ondan sonrakı vəziyyətlə bağlı qavrayışlara dezinformasiya və saxta xəbərlər çox təsir edib. Son dövrlər hökumət səviyyəsində, o cümlədən xarici işlər nazirləri arasında keçirilən görüşlər və təmaslar, eləcə də Xarici İşlər nazirliklərimiz arasında Bakıda aparılmış siyasi məsləhətləşmələr bizim mövqeyimizi və regionumuzdakı reallıqları anlamağa çox kömək etdi. Bütün bunlar həm də ümumi maraq doğuran məsələlərin müzakirəsinə və yeni əməkdaşlıq istiqamətlərinin müəyyənləşdirilməsinə imkan yaratdı. Artıq müsbət nəticələr də görünür”, - deyə o əlavə edib.
Yazıda, həmçinin Azərbaycan ərazilərinin işğaldan azad edilməsindən və ərazi bütövlüyümüzün bərpasından sonra baş vermiş hadisələrə də toxunulub. Azərbaycanın öz maliyyə imkanları ilə işğaldan azad edilmiş ərazilərdə əsaslı bərpa və yenidənqurma işlərini həyata keçirdiyi, ancaq bu ərazilərin milyonlarla mina ilə çirklənməsinin quruculuq işlərinə böyük maneə yaratması diqqətə çatdırılıb. Minaların qurbanları haqqında məlumat verilib. Vurğulanıb ki, iki ölkə bu gün sülhə nail olmağa yaxındır.
Diplomat müsahibəsində qeyd edib ki, iqtisadi əməkdaşlıq Azərbaycan və Niderland münasibətlərinin təməl daşıdır və ticarət, investisiya və birgə layihələrin davamlı artımı ilə səciyyələnir. 2024-cü ildə Azərbaycanda 130-a yaxın Niderland şirkəti fəaliyyət göstərib. Niderlandın Azərbaycana sərmayələri təxminən 1,5 milyard ABŞ dolları təşkil edir. Ölkəmizdə Niderland sərmayələri əsasən qeyri-neft sektorlarına yönəlib ki, bu da Azərbaycanın strateji iqtisadi şaxələndirmə hədəfinə uyğundur. Azərbaycan Niderlanda 2,5 milyard ABŞ dollarından çox sərmayə yatırıb və 2024-cü ildə qarşılıqlı ticarət əvvəlki illə müqayisədə 60 faiz artıb.
Müsahibədə Azərbaycanın turizm imkanlarından da söz açılıb. Ölkəmizin füsunkar müasir memarlıq abidələri - Heydər Əliyev Mərkəzi, “Alov qüllələri”, eləcə də UNESCO-nun Ümumdünya İrs Siyahısına daxil edilmiş qədim və tarixi məkanlar haqqında, ölkəmizin ev sahibliyi etdiyi beynəlxalq yarışlar və tədbirlər barədə ətraflı məlumat verilib.
Bölmənin digər xəbərləri
