Ötən il Qaxda 705 hektarda təkrar qarğıdalı əkilib
Qax, 26 yanvar, Mustafa Dadaşov, AZƏRTAC
Ötən il Qax rayonunun təsərrüfatlarında 320 hektarı yaşıl yem, 385 hektarı dən üçün olmaqla, 705 hektar sahədə təkrar qarğıdalı əkini aparılıb. Torpaq mülkiyyətçiləri təkrar qarğıdalı əkinlərindən 6684 ton yaşıl yem və 1315 ton dənlik məhsul götürüblər. Yaşıl yem üçün əkilmiş sahələrin hər hektarında orta məhsuldarlıq 208,8 sentner, dənlik qarğıdalı sahələrində isə 34,1 sentner təşkil edib.
Bu barədə AZƏRTAC-ın bölgə müxbirinə Qax Dövlət Aqrar İnkişaf Mərkəzinin bitkiçilik sektorunun baş məsləhətçisi Ülvi Əzimov məlumat verib.
Qurumun rəsmisinin sözlərinə görə, rayonda təkrar əkinlərə maraq ildən-ilə artır. Bu da təsadüfi deyil. Təkrar əkinlər fermerlər üçün il ərzində ikinci dəfə subsidiya almaq imkanı, əlavə gəlir, eyni zamanda, torpaqdan səmərəli istifadə deməkdir.
Qeyd edək ki, təkrar qarğıdalı əkininə görə fermerlərə dövlət tərəfindən hər hektara 120 manat subsidiya ödənilir.
Bölmənin digər xəbərləri
