Ötən il tullantıların 56,8 faizi mədənçıxarma sənayesi müəssisələrində yaranıb
Bakı, 5 may, AZƏRTAC
Keçən il ölkədə 3 milyon 276,5 min ton və ya əvvəlki illə müqayisədə 13,1 faiz çox tullantı əmələ gəlib və onların 61,7 faizini bərk məişət tullantıları, 38,3 faizini isə müəssisələrin istehsal fəaliyyəti nəticəsində yaranmış müxtəlif növ tullantılar təşkil edib.
Dövlət Statistika Komitəsindən AZƏRTAC-a bildirilib ki, 2019-cu ildə yaranmış 2 milyon 21,6 min ton bərk məişət tullantılarının 72,9 faizi zərərsizləşdirilməsi məqsədilə poliqonlara daşınıb, 26,8 faizi enerji əldə edilməsi məqsədilə istifadə edilib, 0,3 faizi isə ölkə daxilində satılıb. Məişət tullantılarından istifadə hesabına 195,9 milyon kilovat/saat və ya 2018-ci illə müqayisədə 20,8 faiz çox elektrik enerjisi istehsal olunub.
Sənayedə və iqtisadiyyatın digər sahələrində yaranmış istehsal tullantıları ehtiyatlarının 28,3 faizi müəssisələrdə xammal kimi istifadə edilib, 9,9 faizi ölkə daxilində satılıb, 3 faizi ixrac olunub, 14 faizi zərərsizləşdirilməsi məqsədilə poliqonlara daşınıb, 44,8 faizi isə müəssisələrdə qalıb.
Müəssisələrin istehsal fəaliyyəti nəticəsində 2018-ci illə müqayisədə 6,3 faiz az və ya 317,4 min ton təhlükəli tullantı yaranıb və tullantıların ümumi miqdarında onların payı 9,7 faiz olub. Tullantıların 56,8 faizi mədənçıxarma sənayesi müəssisələrində yaranıb ki, onların da böyük hissəsi Bakı şəhərində yerləşən müəssisələrin payına düşür. Əvvəlki illərdə yaranan qalıqlar da daxil olmaqla, ötən il 66,2 min ton təhlükəli tullantı tamamilə zərərsizləşdirilib.
Bölmənin digər xəbərləri
