ÖZBƏKİSTAN XARİCİ İŞLƏR NAZİRLİYİNDƏ GÖRÜŞ
GUAM təşkilatına daxil olan ölkələrin Özbəkistandakı səfirləri Azərbaycanın Daşkənddəki səfirliyinin təşəbbüsü ilə ölkənin xarici işlər naziri Əbdüləziz Kamilovla görüş keçirmişlər. Görüşün əsas məqsədi rəsmi Daşkəndin GUAM təşkilatına daxil olan dövlətlərin xarici işlər nazirlərinin Bakıda keçirilən iclasında qəbul edilmiş sənədlərə münasibəti və iyulun 19-20-də Yaltada keçiriləcək GUAM ölkələri dövlət başçılarının zirvə görüşündə Özbəkistanın təmsil olunub-olunmamasını müəyyənləşdirmək idi.
Görüşün əvvəlində xarici işlər naziri səfirləri salamlamış və qeyd etmişdir ki, təşkilat çərçivəsində Özbəkistan Respublikasının fəaliyyətinin dayandırılması onsuz da möhkəm olan ikitərəfli əlaqələrin inkişafına mənfi təsir göstərməyəcəkdir.
Azərbaycanın Özbəkistandakı səfiri Aydın Əzimbəyov bildirmişdir ki, dost və qardaş münasibətlərimiz əvvəlki səviyyəsində qalacaq və biz bütün sahələrdə əlaqələrimizi inkişaf etdirmək niyyətindəyik.
Əbdüləziz Kamilov bir daha qeyd etmişdir ki, Azərbaycanın Xarici İşlər Nazirliyinə ünvanlanan notada da deyildiyi kimi, Özbəkistan təşkilatdan çıxmamış, indiki mərhələdə fəaliyyətini dayandırmışdır. O, görüşün iştirakçılarını Özbəkistan Prezidenti İslam Kərimovun Ukrayna Prezidenti Leonid Kuçmaya ünvanladığı cavab məktubunun mətni ilə tanış etmişdir. Məktubda bildirilir ki, Özbəkistan indiki mərhələdə təşkilatın zirvə görüşündə iştirak etməyə hazır deyildir.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
