ÖZBƏKİSTANDAKI SƏFİRİMİZ “DOSTLUQ” ORDENİ İLƏ TƏLTİF OLUNMUŞDUR
Özbəkistan Respublikasının prezidenti İslam Kərimovun fərmanı ilə Azərbaycanın bu ölkədəki fövqəladə və səlahiyyətli səfiri Aydın Əzimbəyov iki dövlət arasında dostluq əlaqələrinin inkişafındakı, müxtəlif sahələrdə qarşılıqlı faydalı əməkdaşlığın möhkəmləndirilməsindəki xidmətlərinə görə və anadan olmasının 70 illiyi münasibətilə “Dostluq” ordeni ilə təltif edilmişdir.
Səfirlikdən AZƏRTAC-ın müxbirinə demişlər ki, bu münasibətlə keçirilən qəbulda Özbəkistanın xarici işlər naziri Əbdüləziz Kamilov prezident İslam Kərimovun imzaladığı fərmanın mətnini oxumuş, Aydın Əzimbəyova gələcək fəaliyyətində müvəffəqiyyətlər arzulamışdır.
Özbəkistan baş nazirinin birinci müavini Kazım Tulaqanov və baş nazirin müavini, Özbəkistan-Azərbaycan hökumətlərarası birgə iqtisadi komissiyasının həmsədri Rüstəm Yunusov diplomatı təbrik etmiş, iki ölkə arasında əməkdaşlığın daha da inkişaf etdirilməsi işində ona uğurlar diləmişlər.
Sonra qonaqlar səfirliyimizin Daşkənddə inşa edilən yeni binasının, habelə Azərbaycan mədəniyyət mərkəzinin və məscidin tikintisinin işin gedişi ilə tanış olmuşlar.
Tədbirlərdə Özbəkistan Prezidenti Aparatının, Nazirlər Kabinetinin, Xarici İşlər Nazirliyinin nümayəndələri, səfirlər, Azərbaycan Mədəniyyət Mərkəzləri Assosiasiyasının rəhbərləri, diasporumuzun tanınmış nümayəndələri iştirak etmişlər.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
