PARİSDƏ AZƏRBAYCAN MİNİATÜR KİTABLARININ SƏRGİSİ AÇILMIŞDIR
Azərbaycanın YUNESKO yanındakı daimi nümayəndəliyinin və qurumun Mədəniyyət siyasəti və müəllif hüquqları şöbəsinin təşkilatçılığı ilə keçirilən sərgini şöbənin mədəniyyət bölməsinin rəhbəri Corc Pussən YUNESKO-nun baş direktorunun adından açaraq demişdir ki, Bakıda miniatür kitab muzeyi barədə məlumatım yox idi. Dünyanın 62 ölkəsində bir çox dillərdə nəşr olunmuş 4050 əsərdən ibarət kolleksiya həqiqətən möcüzədir. Kitabın təbliğində mədəniyyəti və təhsili Zərifə Salahova kimi sevən qadınlara çox böyük ehtiyac vardır.
Dünyada 860 milyondan artıq adamın savadsız olduğunu və 100 milyondan çox uşağın təhsildən kənarda qaldığını xatırladan C.Pussən bir çox ölkələrdə kitaba böyük ehtiyac duyulduğunu vurğulamışdır. O demişdir ki, 1996-cı ildən etibarən YUNESKO hər il aprelin 23-də Ümumdünya kitab və müəllif hüququ günü keçirir. Bu baxımdan Azərbaycan miniatür kitablarından ibarət sərginin məhz indi açılması da təsadüfi deyildir.
Azərbaycan Miniatür Kitab Muzeyinin direktoru Zərifə Salahova sərgidə nümayiş etdirilən şəxsi kolleksiyası barədə danışmışdır. O demişdir: YUNESKO-nun hər il dünyada qeyd etdiyi əlamətdar tarixdə - 2002-ci il aprelin 23-də Bakının qədim “Şirvanşahlar” sarayı yaxınlığında Miniatür Kitab Müzeyi açılmışdır. Bu, dünyada analoqu olmayan bir muzeydir. Mən bu muzeyin təşkili üçün uzun illər böyük zəhmət çəkmişəm. Cənab Corc Pussənin dediyi kimi, hazırda muzeydə 62 ölkədə nəşr olunmuş 4050 miniatür kitab vardır. Amma bu sərgidə onlardan 350-si nümayiş etdirilir. Onların arasında ən böyüyünün ölçüsü 100x100 millimetr, ən kiçiyinin isə 2x2 millimetrdir.
Sərgidə 1815-ci ildə Londonda çap olunmuş “İngiltərə tarixi”, böyük rus şairi A.S.Puşkinin sağlığında, 1837-ci ildə Sankt-Peterburqda çapdan çıxmış “Yevgeni Onegin” poeması, fransız satiriki La Fontenin 1850-ci ildə Parisdə nəşr olunmuş “Təmsillər” kitabı ilə yanaşı, dünya və Azərbaycan klassiklərinin əsərlərindən ibarət miniatür kitablar, habelə Quranın XVII əsrin nəşri olmuş iki nüsxəsi nümayiş etdirilir.
Azərbaycan Prezidenti Heydər Əliyevin andiçmə mərasimlərindəki (Azərbaycan, rus və ingilis dillərində), “Əsrin müqaviləsi”nin imzalanma mərasimindəki, Yeni Azərbaycan Partiyasının birinci qurultayındakı nitqləri də sərginin tamaşaçılarına təqdim olunmuşdur.
Muzeyin kitablar kolleksiyası Kabil, Dəkkə, Moskva, Paris, Sidney, Kiyev və digər şəhərlərdə nümayiş etdirilmişdir.
Sərgiyə gələnlərin bir çoxu xatirə kitabına öz təəssüratını yazmışdır. Fransalı xanım Anik Prtotanın ürək sözləri xüsusi maraq doğurur. O, Azərbaycan, onun mədəniyyəti və tarixi barədə az məlumata malik olduğunu təəssüf hissi ilə vurğulamış, sərginin onda mədəniyyətimiz haqqında yüksək təsəvvür yaratdığını, ilk dəfə belə möcüzə ilə qarşılaşdığını və qəribə hisslər keçirdiyini bildirmişdir.
Sərginin açılışında Azərbaycanın Fransadakı səfiri Tarik Əliyev, YUNESKO yanındakı ayrı-ayrı ölkələrin səfirləri, Fransa ictimaiyyətinin nümayəndələri, Parisdə təhsil alan tələbələrimiz və diasporumuzun təmsilçiləri iştirak etmişlər.
Sərgi aprelin 25-dək davam edəcəkdir.
Bölmənin digər xəbərləri
