Parisdə Azərbaycanın Dostları Assosiasiyası yenidən fəaliyyətə başladı
Paris, 15 iyul (AZƏRTAC). İyulun 14-də Parisdə Azərbaycan mədəniyyəti mərkəzində Azərbaycanın Dostları Assosiasiyasının yenidən fəaliyyətə başlanmasına həsr olunan mərasim keçirildi.
Azərbaycanın Fransadakı səfiri Elçin Əmirbəyov assosiasiyanın Fransanın Azərbaycanda ilk səfiri olmuş Jan Perən tərəfindən təsis olunduğunu və diplomatın uzun müddət bu quruma rəhbərlik etdiyini bildirdi. Vurğulandı ki, son illər ölkələrimiz arasında əməkdaşlıq bütün sahələrdə inkişaf edir və münasibətlərimiz strateji tərəfdaşlıq səviyyəsinə yüksəlib. Səfir dedi ki, ölkələrimiz arasında əlaqələrə yeni dəyərlər vermək məqsədilə Milli Assambleyanın deputatı Jan-Fransua Mansel assosiasiyanın fəaliyyətinin gücləndirilməsi təşəbbüsü ilə çıxış edib.
Fransız və Azərbaycan xalqları arasında dostluq əlaqələrinin daha da gücləndirilməsi istiqamətində hələ çox işlərin görülməsinin vacibliyini vurğulayan səfir, Heydər Əliyev Fondunun təşkilatçılığı ilə Kann şəhərində Azərbaycan mədəniyyəti günlərinin yüksək səviyyədə keçirildiyini xatırlatdı, assosiasiyasının üzərinə düşən vəzifələri layiqincə yerinə yetirəcəyinə və ölkəmizi fransızlara daha yaxından tanıtmaq istiqamətində mühüm layihələr həyata keçirəcəyinə ümidvar olduğunu bildirdi.
Azərbaycanın Dostları Assosiasiyasının sədri Jan-Fransua Mansel xalqımızın qədim tarixini, zəngin mədəni dəyərlərini fransızlara daha yaxından tanıtmaq üçün bütün imkanlardan istifadə edəcəklərini, Azərbaycan ilə bağlı Fransada təşkil olunan müxtəlif tədbirlərdə assosiasiyanın fəal iştirak edəcəyini və əməli kömək göstərəcəyini diqqətə çatdırdı. O, Kannda ikinci dəfə Azərbaycan mədəniyyəti günləri ilə bağlı müxtəlif tədbirlərin yüksək səviyyədə keçirildiyini və bu tədbirlərin istər yerli sakinlər, istərsə də şəhərin qonaqları arasında böyük maraq doğurduğunu vurğuladı.
Sədr Azərbaycan ilə bağlı keçirilən tədbirlərin ölkələrimiz arasında əlaqələrin inkişafına yeni-yeni töhfələr verdiyini və bu tədbirlərin mütəmadi keçirilməsinin əhəmiyyətini xüsusi qeyd etdi. Bildirdi ki, Azərbaycanın Cənubi Qafqazın lider və aparıcı ölkəsi kimi dünyada imici daha da yüksəlib. Tolerantlığı ilə digər ölkələrdən fərqlənən Azərbaycanda milli azlıqlarla yerli əhali arasında heç bir fərq qoyulmur, elə bu səbəbdən də digər ölkələrə əsl tolerantlıq nümunəsidir.
Jan-Fransua Mansel Azərbaycanı fransızlara daha yaxından tanıtmaq üçün onların Bakıya səfərlərinin təşkilinin, şəhərlər arasında qardaşlaşmanın vacibliyini diqqətə çatdırdı, ölkələrimiz arasında əlaqələrin genişlənməsi üçün qarşıda çoxlu işlərin görüləsi olduğunu və bu istiqamətdə əllərindən gələni əsirgəməyəcəklərini bildirdi.
Sonda fransız musiqiçilərinin ifasında Azərbaycan və Qərbi Avropa bəstəkarlarının klassik əsərləri səsləndi.
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
