PARİSDƏ “LÖ PON - KÖRPÜ” JURNALININ NÖVBƏTİ NÖMRƏSİ İŞIQ ÜZÜ GÖRMÜŞDÜR
Xalqlarımız arasında dostluq əlaqələrinin inkişafına xidmət edən jurnalın yeni nömrəsinin üz qabığında Şirvanşahlar və Versal saraylarının, son səhifədə isə Heydər Əliyev adına beynəlxalq hava limanı binasının ümumi və ayrı-ayrı zallarının fototəsvirləri verilmişdir.
Jurnalın birinci səhifəsində assosiasiyanın prezidenti, Paris-8 Universiteti Avropaşünaslıq fakültəsinin magistrantı Mirvari Fətəliyevanın rəhbərlik etdiyi qurumun tarixi, fəaliyyəti, məqsəd və vəzifələri ilə bağlı yazısı dərc edilmişdir.
Sonrakı səhifələrdə Fransa ilə Azərbaycan arasında təhsil və mədəniyyət sahələrində əlaqələrin inkişafında xüsusi xidmətləri olmuş, Fransanın Azərbaycandakı səfirliyinin mədəniyyət və əməkdaşlıq məsələləri üzrə keçmiş müşaviri Gi Şövalye ilə müsahibə verilmişdir.
Ölkəmiz üçün çətin vaxtlarda Bakıda fəaliyyətə başlamış Gi.Şövalye müsahibəsində 1995-ci ildə Nant şəhərində keçirilmiş Üç Qitə Festivalında Azərbaycanın təmsil olunması, 1997-ci ildə Bakıda RFİ fransız radiosunun 105 FM dalğasında yerləşdirilməsi sahəsindəki fəaliyyətindən söhbət açmış, bu və bu cür digər təşəbbüsləri dəstəkləmiş ulu öndərimiz Heydər Əliyevin xatirəsini dərin hörmət və ehtiramla yad etmişdir.
Müsahibədə Azərbaycanın fransız dili müəllimlərinin və bu dildə təhsil alan tələbələrin Fransaya təcrübəyə göndərilməsi, fransız dilinin tədris olunduğu ali məktəblərdə frankfoniya mühitinin, dilçilik və təhsil sahəsində əməkdaşlıq bürosunun, Mədəniyyət Mərkəzinin yaradılması ilə bağlı görülmüş işlərdən söhbət açan Gi Şövalye sonda mədəniyyətlərarası əlaqələri və qarşılıqlı münasibətləri inkişaf etdirmək sahəsində Fransada təhsil alan tələbələrimizə müvəffəqiyyətlər arzulamışdır.
Jurnalda fransız və Azərbaycan dillərində dərc olunmuş digər müsahibə hüquqşünas Jan Kruto ilə aparılmışdır. “Vəkil Jan Kruto və onun Azərbaycana məhəbbəti” adlı müsahibədə fransız hüquqşünası on beş yaşında kollecdə təhsil aldığı dövrdə Azərbaycan legionunun üç əsgəri ilə tanışlıqdan sonra haqqında ilk dəfə eşitdiyi və Fransadan çox-çox uzaqlarda yerləşən qədim tarixə və zəngin mədəniyyətə malik Azərbaycana qəlbində məhəbbət hissi oyandığından bəhs etmiş,1948-ci ildə Paris Siyasi Elmlər İnstitutunu bitirərkən ölkəmizlə bağlı diplom işi yazdığını xatırlatmışdır.
“Mən Avropa, Orta Şərq və Mərkəzi Asiya arasında iqtisadi, sosial və mədəni körpü ola biləcək Azərbaycanın gələcəyinə inanıram… Siz region müsəlmanları arasında daha irəli getmisiniz. Mən inanıram ki, Dağlıq Qarabağ münaqişəsi Azərbaycanın xeyrinə həll ediləcəkdir” - fikri ilə müsahibəsinə yekun vuran Jak Kruto ölkəmizə dərin məhəbbət bəslədiyini dəfələrlə ifadə etmişdir.
Jurnalda “Azərbaycan tarixi” adlı məqalədə ölkəmizin III-IV minillikdən bu günədək olan dövlətçilik tarixindən qısa şəkildə fransız oxuculara məlumat verilmişdir. “Fransa tarixi” məqaləsində isə azərbaycanlı oxuculara Avropa qitəsinin inkişaf etmiş ölkələrindən biri olan Fransanın eramızdan əvvəl - yunan imperiyası tərəfindən işğal edildiyi dövrlərdən XX əsrin əvvəllərinə qədər keçdiyi tarixi yoldan danışılmışdır.
Dahi Azərbaycan bəstəkarı Şərq dünyasında ilk operanın banisi Üzeyir Hacıbəyov və XIX əsrdə ölkəmizə səfərindən aldığı təəssürat əsasında nəşr etdirdiyi “Qafqazda” əsərində geniş söhbət açmış, maraqlı romanları ilə azərbaycanlı oxucuların sevimlisinə çevrilmiş Aleksandr Düma (ata) barədə məqalələr jurnalın ən oxunaqlı yazılarıdır.
Jurnalda 28 May - Respublika günü və 14 iyul - Fransanın Milli bayramı ilə əlaqədar məqalələrdə maraqlı faktlar göstərilmiş, hər iki bayramla bağlı şəkillər verilmişdir.
“Qız qalası” və “Eyfel qülləsi” yazılarında Azərbaycan arxitekturasının incisi və Bakının simvoluna çevrilmiş Qız qalasının, fransız mühəndisi Eyfel tərəfindən inşa edilmiş və bu gün Fransanın rəmzlərindən biri olan bu möhtəşəm qüllənin tarixləri barədə maraqlı qeydlərə rast gəlmək olur.
“Azərbaycan kinosu” adlı məqalədə ölkəmizdə kino sənətinin yaranması və inkişafı barədə söhbət açılmışdır. XIX əsrin sonu XX əsrin əvvəllərində bütün dünyaya səs salmış Bakı nefti ətrafında yaranmış əfsanəvi söz-söhbətin kinonun vətəni hesab edilən Fransada da xüsusi maraq doğurduğunu, A.Mişon adlı fransızın Bakı nefti ilə bağlı sənədli film çəkmək məqsədi ilə Bakıya gəldiyi, çəkdiyi sənədli filmlərin 1899-cu ildə Bakıda təqdimat mərasimini keçirdiyi, həmin filmlərin böyük uğur qazandığı, onun “Qafqaz rəqsləri” və “Bibiheybətdə neftin püskürməsi” filmləri, onların dünya kinematoqrafiyasının 100 illiyi münasibətilə 1995-ci ildə Fransada keçirilmiş mərasimdə nümayiş etdirilməsi və böyük müvəffəqiyyət qazanması yazıda öz əksini tapmışdır.
Belçikalı Piron qardaşlarının 1915-ci ildə Bakıda film istehsal etmək üçün laboratoriya açmaları, bununla əlaqədar Sankt-Peterburqdan rus rejissoru Svetlovu dəvət etmələri, birlikdə “Qadın” , “Ölümdən bir saat əvvəl” və məşhur “Neft və milyonlar səltənətində” filmlərini yaratmaları barədəki məqalədə ölkəmizdə kino sənətinin yaranması və inkişafı haqqında danışılmış, sənədli filmlərlə yanaşı, fransız tamaşaçıları tərəfindən rəğbətlə qarşılanmış bir çox bədii filmlərdən söhbət açılmışdır. Jurnalda Parisdə təhsil alaraq, müvəffəqiyyətlə doktorluq dissertasiyası müdafiə etmiş həmyerlilərimiz, habelə assosiasiyada öz fəallıqları ilə seçilən tələbələr, Novruz bayramı və Parisdə keçirilmiş “Azərbaycanı kəşf et” fotosərgisi barədə məlumatlar yer almışdır.
Nəşrdə Azərbaycan haqqında digər maraqlı yazılar da verilmişdir.
Bölmənin digər xəbərləri
