Nepalda təbii fəlakət nəticəsində itkin düşən Ukrayna vətəndaşlarının sayı 64 nəfərə çatıb
Kiyev, 29 avqust, AZƏRTAC
Nepalda baş verən daşqınlar və torpaq sürüşmələri nəticəsində itkin düşən Ukrayna vətəndaşlarının sayı 64 nəfərə çatıb. Yaralananlar və ya ölənlər arasında Ukrayna vətəndaşlarının olub-olmadığı barədə hələlik məlumat yoxdur.
AZƏRTAC xəbər verir ki, bu barədə Ukrayna Xarici İşlər Nazirliyinin (XİN) məlumatında qeyd edilir.
Ukrayna XİN-in Konsulluq Xidməti Departamenti ailələrlə, eləcə də qurumlarla daim əlaqə saxlayır. Ukraynanın Hindistandakı səfirliyinin konsulluq rəsmilərindən ibarət qrup artıq Nepaldadır.
XİN əlavə edib ki, axtarış-xilasetmə əməliyyatları hər gün səhər tezdən aparılır. Duman təyyarələrin istifadəsini çətinləşdirir və bu, yalnız günün birinci yarısında mümkündür. Peşəkar yanğınsöndürmə və xilasetmə qrupları Çin tərəfindəki Jirong keçid məntəqəsinin ən çox zərər çəkmiş mərkəzi hissəsinə çatıb. Ümumilikdə, 2000-dən çox insan və 300-dən çox texnika səfərbər edilib.
Dağıntıların miqyası və daha çox sürüşmə riski səbəbindən vəziyyət çətin olaraq qalır.
Ukraynanın Hindistandakı səfirliyinin təşəbbüsü ilə Nepaldakı səlahiyyətli orqanlar vasitəsilə bəzi vətəndaşların daşıdığı geolokasiya cihazlarını idarə edən şirkətə İnterpol sorğuları göndərilib. Fəlakətdən əvvəl qeydə alınan son koordinatlar əldə edilib. Şirkət axtarışı asanlaşdırmaq üçün cihazların cari yerini müəyyən etməyə çalışır.
Bölmənin digər xəbərləri
