PARLAMENT KOMİSSİYALARI BİR SIRA QANUN LAYİHƏLƏRİNİN TƏKMİLLƏŞDİRİLMƏSİ ÜZƏRİNDƏ İŞLƏYİRLƏR
Milli Məclisin sədri Murtuz Ələsgərovun tapşırığı ilə parlamentin daimi komissiyaları ötən həftə iclasların gündəliyindən çıxarılmış qanun layihələri üzərində işləyirlər.
Məlumdur ki, “Dövlət satınalmaları haqqında” Qanunun tətbiqi ilə əlaqədar “Hərbi qulluqçuların statusu haqqında” Qanuna təklif edilən dəyişikliklər parlament üzvlərinin böyük narazılığına səbəb olmuş, sənəd yenidən işlənmək üçün geri qaytarılmışdır. Sosial siyasət və iqtisadi siyasət daimi komissiyaları sənədi təkrar müzakirəyə çıxaracaqlar.
Bundan əlavə, aqrar siyasət daimi komissiyası müvafiq hökumət strukturları ilə birgə “Taxıl haqqında” Qanuna dəyişikliklər edilməsi barədə deputatların təkliflərini nəzərdən keçirirlər. Dövlət Taxıl Fondunun saxlanması, yaxud ləğv edilməsi sənəddə başlıca mübahisəli məsələdir. Komissiyanın sədri Eldar İbrahimovun fikrincə, fondun yaradılması haqqında maddənin qalması daha məqsədəuyğundur.
Daimi komissiyalarda “Dövlət rüsumu haqqında” Qanunun tətbiqi ilə əlaqədar bəzi qanunvericilik aktlarına təklif edilən dəyişiklik və əlavələr də müzakirə olunur.
Bölmənin digər xəbərləri
