CƏMİYYƏT
Payız mövsümündə baş verə bilən zəhərlənmələr
![Payız mövsümündə baş verə bilən zəhərlənmələr](/files/2022/3/1200x630/166661470691816278_1200x630.jpg)
Bakı, 24 oktyabr, AZƏRTAC
Payız fəslində qida rasionunda bəzi dəyişikliklər baş verir. Xüsusilə havalar soyuyanda balıq, göbələk və konservləşdirilmiş məhsulların dequstasiyası önə keçir. Belə olan halda zəhərlənmə halları artır. Meyvə-tərəvəz yığılmamışdan bir-iki gün əvvəl dərmandan istifadə olunarsa və dərmanlamadan sonra yağış yağmayıbsa, həmçinin alıcı məhsulları təmiz yumayıbsa, zəhərlənmə baş verə bilər.
AZƏRTAC xəbər verir ki, həkim-terapevt Əminə İsmixanova deyib: “Ən təhlükəli məqam zəhərlənmə zamanı botulizm xəstəliyinin baş verməsidir. Botulizm xəstəliyi zamanı gözlərdə tor görmə, ikiləşmə, tənəffüs zamanı çətinləşmə, qusma, bəzən ishal və hətta müdaxilə olunmadıqda tənəffüs iflici nəticəsində insan həyatını itirə bilər. Bəzən zəhərlənmə zamanı zərərçəkənə qatıq, ayran, süd məhsulları içirdilməsi və yaxud sodalı su ilə mədə yuyulması düzgün yanaşma deyil”.
Balıq və göbələk seçimi zamanı xüsusilə ehtiyatlı davranmaq lazımdır. Ümumiyyətlə, təzəliyinə və keyfiyyətinə təminat verilməyən məhsullardan uzaq olmaq lazımdır.