Paytaxtda Təbriz küçəsinin yenidən qurulması işləri başa çatıb VİDEO
Bakı, 6 iyun, AZƏRTAC
Bakı şəhərinin Nəsimi və Nərimanov rayonları arasında uzanan və sözügedən rayonların əsas nəqliyyat arteriyasını təşkil edən Təbriz küçəsində yenidənqurma işləri yüksək keyfiyyətlə aparılaraq yekunlaşdırılıb.
Bu barədə AZƏRTAC-a Azərbaycan Avtomobil Yolları Dövlət Agentliyinin mətbuat xidmətindən açıqlama verilib.
Məlumata əsasən, küçənin əsaslı şəkildə yenidən qurulması işləri yeraltı kommunikasiya xətlərinin çəkilişi ilə məşğul olan qurumlarla birgə aparılıb. Belə ki, istismar müddəti bitmiş 2,9 kilometr uzunluğunda su və 1,5 kilometr uzunluğunda qaz xətləri yenidən çəkilib, zəruri olan yerlərdə yolun hərəkət hissəsindən kənara çıxarılıb. Birgə aparılan işlər gələcəkdə yolun tez bir zamanda sıradan çıxmasının qarşısını almış olacaq.
Bundan başqa, təmir-tikinti işləri zamanı küçənin Ağa Nemətulla və Əhməd Rəcəbli küçələri arasında yerləşən hissəsində 500 kvadratmetr sahədə 150 metr uzunluğunda və 2-4 metr enində yeni yolayrıcı inşa olunub, yeni işıq dirəkləri quraşdırılıb. Yeni inşa edilən yolayrıcına, həmçinin Əhməd Rəcəbli və Həsənoğlu küçələri arasında yerləşən hissədə və yolboyu mövcud yolayrıcına 1600 kvadratmetr tamet daşları döşənib. Məqsəd həmin ərazidə avtonəqliyyat vasitələrinin normal və təhlükəsiz hərəkətini təmin etməkdir.
Yenidənqurma işləri çərçivəsində köhnə asfalt-beton örtüyünün üst qatı frezlənərək kənara daşınıb, zəruri olan yerlərdə yararsız qrunt qazılaraq çıxarılıb, əks dolğu və kipləşdirmə işləri aparılıb, yolayrıcı və piyada səkiləri bərpa olunub, kənarlarında köhnə səki daşları sökülərək 10 min poqonmetr uzunluğunda yeni səki daşları ilə əvəz olunub.
Təmir-tikinti layihəsi ilə küçəboyu mövcud köhnə yağış-kanalizasiya sistemi bərpa olunaraq işlək vəziyyətə salınıb, zəruri yerlərdə yeni sistem qurulub, 40 ədəd yeni yağış barmaqlıqları və 138 ədəd kommunikasiya xətlərinin baxış qapaqları qoyulub. Sutkanın qaranlıq saatlarında küçənin normal işıqlandırılmasını təmin etmək məqsədilə işıqlandırma sistemi yenilənib, əlavə olaraq yola 28 ədəd işıq dirəyi quraşdırılıb.
Həmçinin küçəboyu texnoloji ardıcıllığa uyğun olaraq 55 min kvadratmetr sahədə 2 laydan ibarət yeni asfalt-beton örtüyünün döşənməsi işləri aparılıb. Sonra avtonəqliyyat vasitələrinin hərəkətinin normal təşkili üçün yeni yol nişanları quraşdırılıb, yolun üfüqi nişanlanma xətlərinin çəkilişi işləri görülüb.
Bundan başqa, Əhməd Rəcəbli küçəsinin bir hissəsində də təmir-tikinti işləri aparılıb. Bu işlər küçənin Təbriz və Fətəli xan Xoyski küçələri arasında yerləşən hissəsində görülüb. Bu hissənin uzunluğu bir istiqamət üzrə 265 metr təşkil edir.
Təmir-tikinti işləri çərçivəsində yolayrıcının eninin kiçildilməsi nəticəsində yolun hərəkət hissəsinin eni genişləndirilib. Yolayrıcına və yolun kənarlarına 1000 poqonmetrdən artıq yeni səki daşı düzülüb, asfalt-beton örtüyünün üst qatı frezlənərək kənara daşınıb, əvəzinə yeni asfalt-beton örtüyü döşənib, yol-cızgi və yolgöstərici xətlər çəkilib.
Bölmənin digər xəbərləri
