Pekində yoluxmalara görə 18 məktəb bağlanıb
Pekin, 2 noyabr, AZƏRTAC
Çin paytaxtında son günlər aşkarlanan COVID-19 yoluxma hallarına görə 18 məktəbdə yerində dərslər dayandırılıb.
AZƏRTAC şəhər hökumətinin məlumatına istinadla xəbər verir ki, sözü gedən məktəblərin 16-sı Pekinin şimal hissəsindəki Çanpin rayonunda əhalinin sıx məskunlaşdığı bir neçə məhəllədə yerləşir. Hazırda Çanpin rayonunda bir yüksək riskli zona, 2 orta riskli zona var. Həmin zonaların sakinləri kütləvi formada koronavirus testindən keçirilir. Ərazidə bütün iş yerləri bağlanıb. Digər 2 məktəb isə paytaxtın əsas rayonlarından olan Çaoyandadır. Bir neçə şagirdin ailə üzvünün virusa yoluxması aşkarlandıqdan sonra həmin məktəblərdə dərslər dayandırılıb, bütün şagird və müəllimlər koronavirus testindən keçirilib.
Rayon rəhbərinin müavini Yan Rençüən bildirib ki, oktyabrın 16-dan bəri rayonda 30 yoluxma aşkarlanıb. Yoluxanlarla yaxın təmasda olmuş 4 min 508 sakin karantinə cəlb olunub.
Qeyd edək ki, hazırkı dalğada paytaxt Pekində 35 yoluxma aşkarlanıb. Paytaxtın səlahiyyətli qurumları gücləndirilmiş rejimdə çalışır. Hökumət 20 milyondan çox əhalisi olan Pekində yoluxmaların çoxalmasından və nəzarətdən çıxmasından narahatdır. Çünki qarşıda “Pekin-2022” Qış Olimpiya Oyunları var.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
