PEKİNİN HÖKUMƏT ORQANLARI ŞƏHƏRDƏ SƏS-KÜY SALANLARI CİDDİ CƏRİMƏLƏMƏK QƏRARINA GƏLMİŞLƏR

21.11.2006 [11:33]
Çap et
A⁺ A^-

AZƏRTAC “Novosti” agentliyinə istinadla xəbər verir ki, Pekinin hökumət orqanları şəhərdə güclü səs-küy salanları ciddi cərimələmək qərarına gəlmişlər.

Pekin hökuməti şəhərdə səs-küyün səviyyəsini nizama salmaq haqqında yeni əsasnamə təsdiq etmişdir. İndən belə tikinti şirkətləri axşam saat 10-dan səhər saat 8-dək və ümummilli imtahan günlərində səs-küylü inşaat işləri aparmağa görə 200 min yuanadək (25 min dollar) məbləğdə cərimələnəcəklər.

Alıcıları səsucaldan cihazla çağıran küçə alverçiləri 50 min yuanadək (6 min dollardan çox) məbləğdə cərimə edilə bilərlər.

Mənzillərində tikinti işləri gördürən və bununla da qonşuları bezdirən ev sahibləri də cərimələnəcəklər. Təyin olunmamış yerdə avtomobilin siqnal verməsinə görə cərimə 5 min yuan (625 dollar) təşkil edə bilər.

Şəhər hökumətinin nümayəndəsi qəbul olunmuş əsasnaməni şərh edərək demişdir: “Sağlam və dərin yuxu sakinlərimiz üçün əlçatmaz hal olmamalıdır”.