Pentaqon: ABŞ qoşunlarının Əfqanıstandan çıxarılması ilə bağlı araşdırma aparılacaq
Bakı, 21 may, AZƏRTAC
ABŞ-ın müdafiə naziri Pit Heqset 2021-ci ildə Amerika qoşunlarının Əfqanıstandan çıxarılmasının şərtlərini araşdırmaq üçün komissiyanın yaradılmasına göstəriş verib.
AZƏRTAC xəbər verir ki, bu barədə Pentaqonun rəhbərinin X-də dərc etdiyi sənəddə deyilir.
"Son üç ay ərzində departament silahlı qüvvələrimizin tarixində baş vermiş bu fəlakətli hadisələri nəzərdən keçirir. Mən belə qənaətə gəldim ki, bu hadisələrə görə məsuliyyəti təmin etmək və Amerika xalqına tam mənzərəni təqdim etmək üçün hərtərəfli araşdırma aparmalıyıq", - sənəddə deyilir.
Heqset xatırladıb ki, 2021-ci il avqustun 26-da Kabil hava limanında törədilən terror aktı nəticəsində 13 hərbçi və 170 mülki şəxs həlak olub. O vurğulayıb ki, xüsusi komissiya əvvəlki araşdırmaların bir hissəsi kimi hazırlanmış hesabatları nəzərdən keçirməli və ABŞ tarixində "ən qaranlıq və ən ölümcül məqamlardan birinə" gətirib çıxaran qərarların qəbulu prosesini təhlil etməlidir.
2021-ci il aprel 14-də ABŞ-ın o zamankı Prezidenti Co Bayden Əfqanıstanda Amerika tarixində ən uzun xarici hərbi kampaniyaya çevrilən əməliyyatı dayandırmaq qərarına gəldiyini açıqladı. ABŞ bu müharibəyə 2001-ci ilin oktyabrında başlayıb. 2010-2013-cü illərdə əməliyyatın pik nöqtəsində Əfqanıstandakı Qərb qüvvələrinin sayı 150 min nəfəri ötüb. Amerika qoşunlarının çıxarılması 2021-ci ilin mayında başlayıb.
Bölmənin digər xəbərləri
