PMS imtahanının nəticələri üç həftə ərzində elan olunacaq
Bakı, 7 may, AZƏRTAC
Peşəkar mühasib sertifikatı (PMS) almaq istəyən namizədlər üçün test imtahanının I mərhələsi keçirilib.
Dövlət İmtahan Mərkəzindən AZƏRTAC-a bildirilib ki, imtahanın nəticələri yazılı cavab tələb edən tapşırıqların yoxlanılması ilə əlaqədar yaxın 3 həftə ərzində elan olunacaq.
Qeyd edək ki, bugünkü imtahan kağız daşıyıcılar vasitəsilə Bakıda 4 binada təşkil olunub. İmtahanın keçirilməsi üçün 4 ümumi imtahan rəhbəri, 10 imtahan rəhbəri, 104 nəzarətçi müəllim, 12 mühafizə (buraxılış rejimi) əməkdaşı cəlb olunub.
İlkin məlumatlara əsasən, 1 nəfərdə mobil telefon tutulub və imtahandan xaric edilib.
İmtahan 3 saat müddətində aparılıb və namizədlərə biliklərinin qiymətləndirilməsi üçün 40 test tapşırığı təqdim edilib. 40 test tapşırığının 30-u qapalı, 10-u açıq tipli tapşırıqlardır. İmtahanda maksimum 100 bal toplamaq mümkündür. Qapalı tipli tapşırıqların 20-si 1 balla, 10-u 2 balla, açıq tipli tapşırıqların 8-i 5 balla, 2-si 10 balla qiymətləndirilir.
PMS imtahanının II mərhələsi (qanunvericilik üzrə) iyunun 18-də keçiriləcək.
Bölmənin digər xəbərləri
