Bakı, 13 sentyabr, AZƏRTAC

Eyni coğrafi regionda yaşayan iki toplum, iki xalq, iki dövlət arasında nə qədər fərq ola bilər? Azərbaycanla Ermənistan arasında xeyirlə şər, gündüzlə gecə və ağla qara arasında olan fərq qədər fərq var. Ancaq ermənilər regiona süni və planlı şəkildə zorla yerləşdirilsələr də, çox təəssüf olsun ki, buraya uyğunlaşdırla bilməyiblər. Yenə də məkr, hiylə və təxribat. Ancaq bu dəfə daha fərqli istiqamətdə, Azərbaycanın hər vəchlə sərhədi müəyyənləşdirməyə çalışdığı rayonlarda. Ermənistan bunu daha fərqli formada, özünün mahiyyətinə və düşüncəsinə uyğun dezinformasiya kontekstində təsdiq edir. İntəhasız və analoqu olmayan yalanlar “istehsal etmək”dən yorulmayan “erməni maşını”nın uydurduğuna görə, ötən gecə Azərbaycan Ermənistan sərhədini pozub. “Yalançının yaddaşı olmaz” deyiblər. Hansı sərhədi? Ermənistana görə olmayan və ya olmasını qəbul etmədikləri bir şeyi pozmaqda bizi elə yenə ancaq bir absurd toplum - erməni toplumu ittiham edə bilər.

Sual yaranır, niyə əvvəlki və ən son 3 avqust tarixində olduğu kimi, sülhməramlıların nəzarəti altında olan ərazilərdə deyil, bu dəfə Laçın, Kəlbəcər və Daşkəsən kimi sərhədyanı ərazilərdə?

Son hadisələr bir daha onu göstərir ki, Azərbaycanın siyasi və diplomatik masada beynəlxalq hüququn bütün prinsiplərinə uyğun olan özünün şərtlərini diktə etdiyi bu dönəmdə erməni tərəfinə yenə də utopik vədlər verənlər var. Ermənistanın qidalandığı bəzi dırnaqarası məfhumları bərpa edə bilməsələr belə, zikr etməklə ona yeni təxribatlara yol vermək üçün sanki ruh verirlər. Ancaq ölüyə ruh vermək mümkün olmadığı kimi, bu da mümkün deyil. Azərbaycan isə real işlər görür. Ölkəmiz on min kvadratkilometrdən artıq bir ərazidə geniş quruculuq və bərpa işləri, nəhəng iqtisadi layihələr həyata keçirmək, nəqliyyat kommunikasiyalarını hazır vəziyyətə gətirmək, sülh sazişinin imzalanması istiqamətində üzərinə düşən bütün öhdəlikləri yerinə yetirmək və “dəmir yumruğ”un daim yerində olması, lazım gələndə isə təxribatçının başını əzməyə hazır olması üçün də hər addımı atmaqla məşğuldur!

Bu fikirləri AZƏRTAC-a açıqlamasında Siyasi və Hüquqi Strateji Araşdırmalar Mərkəzinin rəhbəri politoloq Xəyal Bəşirov deyib.

Politoloq qeyd edib ki, düşmən və ona dəstək göstərən qüvvələr bu reallıqlarla barışa bilmir və ya barışmaq istəmir. Bu cür təxribatları törətməyə onları sövq edən əsas amil məhz budur. Ancaq bunlar hamısı əbəs və mənasız cəhdlərdir. Məkrli və hiyləgər düşmənin hər bir uğursuz cəhdi bizim qələbəmiz və üstünlüyümüzlə nəticələnir. Bu dəfə də belə olacaq.

X.Bəşirovun sözlərinə görə, ötən ayın əvvəlində düşmənin təxribatına Azərbaycan Silahlı Quvvələrinin layiqli cavabı nəticəsində ölkəmiz düşmənə ağır itkilər verməklə yanaşı, bizə hava və su kimi lazım olan yüksəklikləri fəth etməyə, Laçın dəhlizinin boşaldılmasına nail oldu. Bütün yüksəkliklərin nəzarətimizdə olduğu ərazilərdən keçən yeni yol düşmənin məkrli manevr imkanlarını tam məhdudlaşdırıb. Artıq istədikləri zaman ərazilərimizə diversant göndərmək şansları yoxdur. Bu səbəbdəndir ki, təxribatlar artıq Ermənistan sərhədləri daxilində baş verir. Bunun digər göstəricisi də Ermənistanın baş naziri Nikol Paşinyanın Kollektiv Təhlükəsizlik Müqaviləsi Təşkilatına müraciət etməsidir. Öz dövlətini idarə edə bilməyən Ermənistanın ümidinə qalmış bir təşkilatın bu məsələdə Azərbaycana hansısa təsir mexanizmi ola bilməz. Digər tərəfdən də bu təxribatın Azərbaycandan qaynaqlandığı iddiasının absurdluğu ondadır ki, azad etdiyi iyirmi faiz ərazisində gecə-gündüz bərpa və quruculuq işləri həyata keçirən bir dövlət bunu edə bilməz.

“Bu addımları ataraq gələcəkdə Azərbaycana qarşı beynəlxalq müstəvidə əsassız və absurd ittihamlar irəli sürmək arzusunda olan Ermənistan və onun havadarları zərrə qədər də ümidlənməsinlər. Çünki bu gün bizə qarşı hazırlanan, heç bir əsası olmayan ittihamlara cavablarımız artıq verilib və bundan sonra da veriləcək. Bu cavabı biz İkinci Qarabağ müharibəsinə qədər Ermənistandan fərqli olaraq sülh və danışıqlar prosesinə sadiqliyimizlə verdik. Bu cavabı biz 44 gün ərzində düşməndən tam fərqli olaraq onun yalnız və yalnız hərbi hədəflərini və hərbi obyektlərini zərgər dəqiqliyi ilə vurmaqla verdik. Bu cavabı biz müharibədən sonra düşmənin əlimizə keçən əsirlərini və digər hərbçilərini ona təhvil verərək nə qədər humanist olduğumuzu isbat etməklə verdik. Azərbaycan Ermənistanın cavabını həm də müharibədə qapıları ordumuzun qarşısında taybatay açıq olan mülki insanların olduğu Xankəndiyə deyil, daha əlçatmaz və çətin olan Şuşaya girməklə verdi. Həmçinin biz bu cavabı müharibədən dərhal sonra Prezident İlham Əliyevin və Birinci vitse-prezident Mehriban xanım Əliyevanın azad olunmuş ərazilərə səfər edərək oradakı vəhşilikləri bütün dünyaya nümayiş etdirməklə verdik. Bütün bunların cavabını biz artıq iki ilə yaxın bir dövrdə qalib ölkənin başçısından daha çox regionda sülhü, təhlükəsizliyi və sabitliyi bərqərar etmək uğrunda mübarizəyə qoşulan Prezidentimizin sülh təşəbbüsləri və çağırışları ilə verdik. Biz bunun cavabını dünən gecə saatlarında növbəti təxribatlar törədən düşmənə son Brüssel görüşündən bir neçə gün sonra beş ermənini qaytarmaqla verdik”, - deyə X.Bəşirov vurğulayıb.

Politoloq diqqətə çatdırıb ki, ancaq elə həmin beynəlxalq ictimaiyyətin qarşısında bizim də daha əsaslı və daha haqlı suallarımız var və olacaq: “Hanı Birinci Qarabağ müharibəsində əsir düşmüş dörd minə yaxın azərbaycanlı əsir və ya onların müqəddəratı ilə bağlı məlumatlar? Hanı bir milyona yaxın mina və partlamamış silahların dəqiq xəritələri? Hanı iyirmi faiz ərazilərimizdəki dini, tarixi və mədəni abidələrimiz, məscidlərimiz, qəbirlərimiz, faunamız, floramız, ekologiyamız, şəhərlərimiz, yeraltı və yerüstü sərvətlərimiz və orada bizə aid olan və heç nə qalmayan hər şeyimiz?!”

Xəyal Bəşirov deyib ki, bizi regionda böyük sülh sazişini imzalamaqdan heç kim məhrum edə bilmədiyi kimi, haqlarımızı müdafiə etməkdən də heç kəs çəkindirə bilməz.

“Bütün təxribatların cavabını verməyə həmişə hazırıq, dəmir yumruq yerindədir. Çünki Prezident İlham Əliyevin də qeyd etdiyi kimi, biz sülhə hazır olduğumuz kimi, düşmənin də nə qədər hiyləgər, nə qədər təhlükəli və nə qədər məkrli olduğunu çox gözəl bilirik. Ancaq bizim verəcəyimiz bu suallardan əvvəl Ermənistanın hazırkı siyasi və hərbi rəhbərliyi bu günlərdə erməni valideynlərin çoxsaylı canlı itkilərlə bağlı onlara ünvanlayacağı suallara cavab tapsınlar. Bu sualın isə bir cavabı var, erməni əsgəri və zabiti ölmək istəmirsə, rədd olsun Azərbaycan torpaqlarından və bizim ərazilərimizə əsla boylanmasın. Çünki Qarabağ və bu torpaqlar Azərbaycandır!”,- deyə politoloq fikirlərini yekunlaşdırıb.