Polşanın Piotrkov Trıbunalski şəhərində “Azərbaycan Günü” keçirilmişdir
Bakı, 16 noyabr (AZƏRTAC). Polşanın Piotrkov Trıbunalski şəhərindəki Yan Koxanovski Universitetində “Azərbaycan Günü” keçirilmişdir.
Azərbaycanın Polşadakı səfirliyindən AZƏRTAC-a bildirmişlər ki, tədbiri açan Yan Koxanovski Universitetinin Piotrkov Trıbunalski şəhərindəki filialının rektoru, professor Zıqmunt Matuşak tələbə və müəllim heyətinə ölkəmiz haqda məlumat vermişdir.
Sonra səfir Həsən Həsənov çıxış edərək təhsil ocağının müəllim və tələbə heyətinin Azərbaycana maraq göstərməsini sevindirici hal kimi qiymətləndirmişdir. Diplomat bu marağın Azərbaycana qarşı sevgiyə çevriləcəyinə əminliyini bildirmişdir. Səfir tələbələrə Azərbaycan-Polşa diplomatik əlaqələrinin yaranmasının 540 illik tarixindən danışmış, ölkəmizin inkişafında polyakların verdiyi töhfələri xüsusi vurğulamışdır. Memarlıqda Bakı romantizmi üslubunun yaradıcılarının Azərbaycanda fəaliyyət göstərən polyak memarların olduğu tələbələrin diqqətinə çatdırılmışdır. Səfir Azərbaycan Xalq Cümhuriyyəti dövründə polyakların dövlət strukturlarında tutduqları vəzifələrdən, ölkəmiz uğrunda güllələnən general Matsey Sulkeviçdən, həmçinin azərbaycanlı polkovnik Vəli bəy Yadigarın Polşa uğrunda qəhrəmanlıqlarından danışmışdır.
Səfir Həsən Həsənov Azərbaycan Prezidenti İlham Əliyevin və Polşa Prezidenti Bronislav Komorovskinin qarşılıqlı səfərlərinin ölkələrimiz arasında mövcud əlaqələrin yüksək səviyyəsinin əyani göstəricisi olduğunu vurğulamışdır. Diplomat səfirlik tərəfindən polyak dilində Azərbaycan ilə bağlı müxtəlif seriyalar üzrə nəşr etdirilmiş 25 adda kitabın Jan Koxanovski Universitetinin kitabxanasına hədiyyə verildiyini bildirmişdir.
Universitetin tarix-filologiya fakültəsinin dekanı, professor Markov Dutkieviç Azərbaycan-Polşa əlaqələrindən danışmışdır. Professor ölkələrimiz arasında əlaqələrin gələcəkdə daha sıx inkişafı üçün gənclərimizin Azərbaycanı və Polşanı yaxından tanımalarının vacibliyini qeyd etmişdir.
Səfirlik tərəfindən nəşr etdirilmiş 25 adda kitabın “Azərbaycan Günü” tədbirləri çərçivəsində universitetdə sərgisi olmuşdur.
Sərginin açılışında Həsən Həsənov “Azərbaycanın Dağlıq Qarabağ regionu” seriyasına aid kitablar haqda ətraflı məlumat vermişdir. Bildirilmişdir ki, Azərbaycan torpaqlarının 20 faizi Ermənistan silahlı qüvvələri tərəfindən işğal olunmuş, nəticədə bir milyon azərbaycanlı öz doğma yurdlarından didərgin düşmüşdür.
Filialın rektoru, professor Zıqmunt Matuşak sərginin bir ay ərzində fəaliyyət göstərəcəyini vurğulamış, Azərbaycana həsr olunmuş görüşlərin universitetdə müntəzəm keçiriləcəyinə əminliyini bildirmişdir.
Səfir Həsən Həsənov Piotrkov Trıbunalski şəhərinə səfəri çərçivəsində mer Kjıştof Xoyniak ilə görüşmüş, Azərbaycan haqda ətraflı məlumat verilmişdir.
Azərbaycan haqqında ətraflı məlumata görə təşəkkürünü bildirən mer ölkəmizlə bağlı bütün təkliflərə açıq olduğunu diqqətə çatdırmışdır.
Həsən Həsənov Piotrkov Trıbunalski povyatının (rayonunun) başçısı Stanislav Çubala ilə də görüşmüşdür.
Görüşdə səfirə Piotrkov Trıbunalski povyatı, eləcə də buradakı tədris ocaqları və istehsal müəssisələri haqda məlumat verilmişdir.
Səfir Həsən Həsənov Azərbaycan rayonlarının inkişafı, müasir standartlara uyğun yolların salınması və əyalətlərdə yeni açılan müəssisələr haqda məlumat vermiş, ölkəmizin qeyri-neft sektorunun sürətli inkişafından danışmışdır.
Silsilə tədbirlər çərçivəsində səfir Həsən Həsənovun Polşa Tarixçilər Birliyinin üzvləri və Yan Koxanovski Universitetin Elmi Şurası nümayəndələrinin iştirakı ilə “Azərbaycan Xalq Cümhuriyyəti qurulması ərəfəsində” mövzusunda çıxışı olmuşdur.
Diplomat çıxışında 1917-ci ilin martından 1918-ci il mayın 28-dək Cənubi Qafqazda və Azərbaycanda baş vermiş hadisələrdən danışmış, Cümhuriyyətin yaranması barədə ətraflı məlumat verilmişdir. O, Azərbaycanın Versal Sülh Konfransında de-yure tanındığını, lakin XI Qızıl Ordunun hücumu ilə Cümhuriyyətin süqut etdiyini iştirakçıların diqqətinə çatdırmışdır.
Tarix-filologiya fakültəsinin dekanı və Polşa Tarixçilər Birliyinin professoru Markov Dutkieviç Azərbaycan tarixi ilə bağlı belə görüşün ilk dəfə keçirildiyini bildirmişdir. O, Azərbaycanın Polşa tarixçi alimlərinə tanıdılması məqsədilə oxşar görüşlərin keçirilməsinin vacibliyini vurğulamış, ətraflı məlumata görə təşəkkürünü bildirmişdir.
Tədbirlərlə bağlı yerli mediaya müsahibələr verilmiş, Piotrkov Trıbunalski şəhərinin meri Kjıştof Xoyniaka, povyatın başçısı Stanislav Çubalaya, eləcə də Yan Koxanovski Universitetinin rektoru, professor Zıqmunt Matuşaka, tarix-filologiya fakültəsinin dekanı, professor Markov Dutkieviçə, dekan müavini Yanuş Budzinskiyə, Tarix İnstitutunun direktoru Jatsek Bonarekə, direktor müavini Paveł Olszevskiyə Azərbaycan-Polşa əlaqələrinin 540, bərpasının 20 illiyinə həsr olunmuş xatirə medalları təqdim edilmişdir.
Bölmənin digər xəbərləri
