QAFQAZIN DİN XADİMLƏRİ REGİONDA SÜLHÜ VƏ SABİTLİYİ BƏRQƏRAR ETƏYƏ ÇAĞIRIRLAR
Tbilisinin “Krtsanisi” dövlət iqamətgahında “Qafqazda sülh naminə əməkdaşlıq” mövzusunda beynəlxalq konfrans açılmışdır. Gürcüstan dövlətinin himayəsi ilə keçirilən və Gürcü Pravoslav Kilsəsi, Qafqaz Müsəlmanları İdarəsi, Etnik və Konfessional Qarşılıqlı Münasibətlər Mərkəzi, Tbilisi Dövlət Universiteti tərəfindən təşkil olunmuş forumun işində katolikos II İliya, şeyxülislam hacı Allahşükür Paşazadə, erməni qriqorian, yəhudi, katolik, lüteran, baptist kilsələrinin xadimləri, ilahiyyatçı alimlər, Türkiyə, İran və Küveytdən gəlmiş qonaqlar, BMT, Avropa Komissiyası və ATƏT-in təmsilçiləri, regiondakı diplomatik nümayəndəliklərin üzvləri iştirak edirlər.
Konfransı Tbilisi Dövlət Universitetinin rektoru Roin Metreveli açaraq iştirakçıları salamladı. Sonra Gürcüstan Prezidenti Eduard Şevardnadze çıxış etdi. O, bu tədbirin təkcə Qafqaz üçün deyil, ətraf regionlar üçün də böyük əhəmiyyətindən, ateist sovet quruluşu dağıldıqdan sonra dinin və din xadimlərinin ictimai həyatda, xalqlar arasında dostluq yaradılmasında mühüm rol oynamasından, o cümlədən Qafqazdakı milli münaqişələrin dincliklə həlli sahəsindəki səylərindən danışdı və ümidvar olduğunu bildirdi ki, din xadimləri bu fəaliyyətlərini bundan sonra da davam etdirəcəklər. Cənab Şevardnadze ölkələr arasında dostluqdan söz açaraq, xristian Gürcüstanı ilə müsəlman Azərbaycanı arasındakı dostluq və qardaşlıq münasibətlərinin bütün dünyaya nümunə olduğunu vurğuladı.
Ölkəmizin Tbilisidəki səfiri Hacan Hacıyev Azərbaycan Prezidenti Heydər Əliyevin konfrans iştirakçılarına məktubunu oxudu.
Sonra forum işinə başladı. Konfransdan məqsəd regiondakı vəziyyətə konkret qiymət verməkdən, xalqlar və dövlətlər arasında dostluq münasibətlərinin və əməkdaşlığın inkişafı üçün zəruri olan sülhün, sabitliyin və firavanlığın mühüm amili kimi Qafqaz dinləri arasında dialoq aparılması imkanlarını müəyyənləşdirməkdən, regionda sülhə nail olmaq yollarının axtarışında təmas nöqtələrini aşkara çıxarmağa kömək edə biləcək tövsiyələr hazırlamaqdan, Beynəlxalq Sivilizasiyalararası Münasibətlər Mərkəzi yaratmaqdan və s. ibarətdir. Konfrans iştirakçılarının çıxışlarında bu və digər məsələlərdən ətraflı bəhs olundu.
Bütün Gürcüstanın müqəddəs və məsud katolikosu II İliya öz çıxışında din xadimlərinin birgə səyləri ilə elə bir Qafqaz Evi yaratmağa çağırdı ki, milliyyətindən və dini etiqadından asılı olmayaraq, regionun hər bir sakini özünü çoxmillətli böyük bir ailənin bərabər hüquqlu üzvü kimi hiss etsin.
Qafqaz Müsəlmanları İdarəsinin sədri şeyxülislam hacı Allahşükür Paşazadə Azərbaycan Prezidenti Heydər Əliyevin qayğısı və səyləri sayəsində ölkəmizdə bütün dinlərin nümayəndələrinin öz dinlərinə azad və sərbəst surətdə etiqad etməsindən, heç bir maneə olmadan öz ibadətgahlarını ucaltmasından söhbət açdı.
Forumda Türkiyənin diyanət işləri naziri Əhməd Nuri Yılmaz, İran rəhbəri ayətüllah Xamneinin Qafqaz ölkələri üzrə nümayəndəsi Ocaq Nicati və başqaları da çıxış etdilər.
Beynəlxalq konfrans iyulun 19-da başa çatacaqdır.
Forumun işinin birinci günündən sonra Gürcüstan Prezidenti Eduard Şevardnadze Qafqaz Müsəlmanları İdarəsinin sədri şeyxülislam hacı Allahşükür Paşazadəni qəbul etdi. O, konfransın işində iştirak etdiyinə görə şeyxülislama təşəkkürünü bildirərək, Gürcüstanda yaşayan və ölkənin bərabər hüquqlu vətəndaşları olan yarım milyonadək müsəlmanın öz müqəddəs dininə sərbəst şəkildə etiqad etdiyini, onların ictimai həyata fəal qoşulduqlarını, son illər ölkədə tikilən məscidlərin sayının xeyli artdığını vurğuladı. Hacı Allahşükür Paşazadə dövlətimizin başçısının salamını və xoş arzularını Gürcüstan rəhbərinə çatdıraraq, ümidvar olduğunu söylədi ki, Heydər Əliyev və Eduard Şevardnadze kimi görkəmli siyasi xadimlərin əzmkarlığı və ardıcıl səyləri sayəsində Qafqazdakı münaqişələrə dincliklə son qoyulacaqdır. Şeyxülislam Azərbaycandakı ictimai-siyasi vəziyyət barədə də məlumat verdi.
Şahismayıl Məmmədov
AZƏRTAC-ın xüsusi müxbiri
Tbilisi
Bölmənin digər xəbərləri
