QANUNSUZ GƏTİRİLƏN SİQARET VƏ NARKOTİK MADDƏ TUTULMUŞDUR
Dövlət Gömrük Komitəsinin mətbuat xidmətindən AZƏRTAC-a bildirmişlər ki, Rusiya istiqamətindən gələn “Mersedes-Benz 0303” markalı “Moskva-Gəncə” sərnişin avtobusu “Samur” gömrük postunda saxlanılmışdır. Baxış zamanı avtobusun şərnişini Azərbaycan vətəndaşı Zakir Cəfərovdan aksiz markası olmayan 2000 qutu “Yava” siqareti və 8 ədəd “Staraya Moskva” arağı aşkar olunmuşdur.
Astara Gömrük İdarəsində isə Azərbaycana gələn İran vətəndaşı Həbibulla Nəsirin üstünə keçirilən baxışı zamanı 0,16 qram tiryək aşkarlanaraq götürülmüşdür.
Hər iki faktla bağlı araşdırma aparılır.
