Qaradağ rayonunda yaşayan xocalılılarla görüş keçirilmişdir
Bakı, 25 fevral (AZƏRTAC). Fevralın 25-də Qaradağ Rayon İcra Hakimiyyətində bu rayonda məskunlaşmış Xocalı sakinləri ilə görüş keçirilmişdir.
İcra hakimiyyətindən AZƏRTAC-a bildirilmişdir ki, görüşdə çıxış edən Qaradağ Rayon İcra Hakimiyyəti başçısının müavini Elnur Qurbanov 1992-ci il fevralın 25-dən 26-na keçən gecə xüsusi qəddarlıqla törədilmiş Xocalı faciəsinin iki yüz ilə yaxın müddətdə erməni şovinist-millətçiləri tərəfindən azərbaycanlılara qarşı müntəzəm olaraq həyata keçirilən etnik təmizləmə və soyqırımı siyasətinin davamı, ən qanlı səhifəsi olduğunu demişdir. Xocalı qətliamının Ermənistanın Dağlıq Qarabağı işğal etmək məqsədilə apardığı işğalçılıq müharibəsi gedişində dinc azərbaycanlı əhaliyə qarşı törədilmiş soyqırımı cinayətlərinin miqyasca ən dəhşətlisi olduğu bildirilmiş, bu faciənin dünyada tanıdılması istiqamətində dövlətimiz tərəfindən görülən məqsədyönlü işlər barədə məlumat verilmişdir. Ölkəmizdə hər bir vətəndaş kimi, xocalılılara da xüsusi diqqət və qayğının göstərildiyi diqqətə çatdırılmışdır.
Görüşün sonunda Qaradağ rayonu ərazisində yaşayan Xocalıdan olan ailələrə rayon icra hakimiyyəti tərəfindən ərzaq və maddi yardım verilmişdir.
Bölmənin digər xəbərləri
