Qasırğa Xorvatiyanın şimalını viran qoymuşdur: ölənlər və yaralananlar var
Bakı, 12 noyabr (AZƏRTAC). Ötən gecə Xorvatiyanın şimal rayonlarının məruz qaldığı qasırğa əhali arasında tələfatla nəticələnmişdir. Sürəti saniyədə 60 metrə çatan güclü külək ağacları kökündən qoparmış, hasarları və reklam lövhələrini aşırmışdır.
Varajdin şəhərində küləyin yıxdığı ağac bir kişinin üstünə düşmüş, nəticədə həmin adam ölmüşdür. Ölkənin ən iri ticarət limanı Riyeka ətrafında təxminən 20 adam zərər çəkmişdir. Onlardan ikisinin vəziyyəti ağırdır. Hazırda ölkənin şimal bölgələrinin çoxu nəqliyyat kollapsı həddindədir.
“24sata” saytının yazdığına görə, Xorvatiya Daxili İşlər Nazirliyi asayişi təmin etmək üçün ciddi tədbirlər görür. Bildirilir ki, qasırğalı külək ölkənin memarlıq abidələrindən birinin - Köhnə Dəyirmanın divarının bir hissəsini dağıtmışdır.
Maraqlıdır ki, qasırğa Zaqreb aeroportunun işinə mane olmamışdır. Təyyarələrin yerə enməsi və uçması cədvələ uyğun həyata keçirilir.
Hazırda Xorvatiyanın bütün növbətçi xidmətləri təbii fəlakətin nəticələrinin aradan qaldırılmasına cəlb olunmuşdur. Ölkənin şimalında maksimum gücündə fırtına haqda xəbərdarlıq elan edilmişdir.
Bölmənin digər xəbərləri
