QAX İCTİMAİYYƏTİ PREZİDENT İLHAM ƏLİYEVİN ŞİMAL-QƏRB BÖLGƏSİNƏ SƏFƏRİNİ YÜKSƏK DƏYƏRLƏNDİRİR
AZƏRTAC-ın müxbiri xəbər verir ki, idarə və müəssisə, bələdiyyə orqanları rəhbərlərinin, sahibkarların, ictimaiyyətin nümayəndələrinin iştirak etdikləri yığıncaqda çıxış edən rayon icra hakimiyyətinin başçısı Abbas Göyüşov Prezident İlham Əliyevin bölgəyə səfəri çərçivəsində aprelin 12-də Qax rayonunda keçirdiyi görüşlərdə, aprelin 13-də Şəki şəhərində keçirilən zona müşavirəsində bölgənin gələcək sosial-iqtisadi inkişaf istiqamətləri ilə bağlı verdiyi tövsiyə və göstərişlərdən danışmışdır.
Dövlətimizin başçısının Qax rayonunda olmasının əhalidə böyük inam və ruh yüksəkliyi yaratdığını bildirilmiş, bu səfərin yekunları ilə bağlı qəbul ediləcək qərarların rayonun sosial-iqtisadi inkişafına çox böyük təsir göstərəcəyi vurğulanmışdır.
Sonra çıxış edən ayrı-ayrı idarə və müəssisə rəhbərləri, yerli iş adamları bölgənin inkişafına diqqət və qayğısına görə ölkə Prezidentinə dərin minnətdarlıqlarını bildirmiş, rayonun sosial-iqtisadi problemlərinin həlli üçün daha da səylə çalışacaqlarını vurğulamışlar.
Yığıncaqda Prezident İlham Əliyevin Qax rayonu ictimaiyyəti ilə görüşü zamanı verdiyi tapşırıq və tövsiyələrin yerinə yetirilməsinə dair xüsusi tədbirlər planı müzakirə olunaraq təsdiq edilmişdir.
Yığıncaqda Qax ictimaiyyəti adından Azərbaycan Prezidenti İlham Əliyevə müraciət qəbul olunmuşdur.
Müraciətdə deyilir:
- Hörmətli cənab Prezident!
Qax rayonunun ictimaiyyəti təməli ulu öndərimiz Heydər Əliyev tərəfindən qoyulan və Sizin uğurla davam etdirdiyiniz daxili və xarici siyasət xəttini ürəkdən bəyənir və müdafiə edir. Məhz bu siyasətin düzgünlüyü və uğurla aparılması nəticəsində respublikamız iqtisadi inkişaf baxımından yalnız postsovet məkanında deyil, bütövlükdə dünyada lider dövlətə çevrilmişdir. Sizin Azərbaycan xalqının ümummilli lideri Heydər Əliyevin ideyalarına sadiqliyiniz, onun işini uğurla davam etdirməyiniz sayəsində Azərbaycan dövləti həm iqtisadi, həm də siyasi sahədə böyük uğurlar qazanmış, dünyada analoqu olmayan inkişaf mərhələsinə qədəm qoymuşdur…
Hörmətli cənab Prezident!
İqtisadiyyatın tarazlı inkişafına yönəldilmiş tədbirlər baxımından Sizin 2004-cü il 11 fevral tarixli Fərmanınızla təsdiq olunmuş “Azərbaycan Respublikası regionlarının sosial-iqtisadi inkişafı Dövlət Proqramı (2004-2008-ci illər)” xüsusi əhəmiyyət daşıyır. Dövlət Proqramının icrası, həyata keçirilən tədbirlər, görülən təxirəsalınmaz işlər artıq öz bəhrəsini verməkdədir…
Qax rayonu kənd təsərrüfatı rayonu olduğundan əhalinin gəlirləri əsasən bu sahədən əldə edilmiş vəsait hesabına formalaşır. Dövlət Proqramına uyğun olaraq rayonda taxılçılığın, tütünçülüyün, heyvandarlığın inkişaf etdirilməsi istiqamətində müəyyən işlər görülmüşdür. Məhsul istehsalını artırmaq və fermerlərə əməli kömək göstərmək məqsədi ilə rayonda “Aqrolizinq” ASC-nin xətti ilə yeni “Aqrotexservis” müəssisəsi yaradılmış, lazımi texnikanın və gübrələrin gətirilməsi təmin olunmuşdur. Damazlıq müəssisəsində yenidənqurma işləri aparılmış, baramaçılığın yem bazasının inkişaf etdirilməsi üçün 234 min ədəd məhsuldar tut tingi əkilmiş, müəssisədə yeni toxum laboratoriyası işə salınmış, 85 kiloqram barama toxumu istehsal edilmişdir. 2005-ci ildə tütün əkini sahələri 450 hektara çatdırılmış, 1100 ton məhsul istehsal olunmuşdur.
Rayonda sənaye müəssisələrinin açılmasına da xüsusi diqqət yetirilir. Dövlət Proqramının qəbul edilməsindən keçən dövr ərzində 5 fındıq emalı sexi, 9 mineral su sexi, 3 qum-çınqıl istehsalı sexi, 4 qum karxanası, 2 un dəyirmanı, 1 asfalt zavodu, 2 tikiş sexi, gündəlik istehsal gücü 500 kiloqram olan yeni çörək sexi, meyvə şirələri, üzlük plitələr istehsal edən sexlər və s. istifadəyə verilmişdir. Beş ildə 1972 nəfərin işlə təmin olunması proqnozlaşdırıldığı halda, artıq 2100 nəfər işlə təmin edilmişdir. Bunun 1400-ə qədəri daimi iş yerləridir.
Zati-aliləri!
Rayonumuzun flora və faunasının zənginliyi, coğrafi şəraiti, tarixi və mədəniyyət abidələrinin çoxluğu turizmin inkişafı üçün geniş imkanlar açır. Xalqımızın ümummilli lideri Heydər Əliyevin 2002-ci il 27 avqust tarixli Sərəncamı ilə təsdiq edilmiş 2002-2005-ci illər üçün turizmin inkişafına dair Dövlət Proqramında nəzərdə tutulmuş istiqamətlərdən biri də Şəki-Qax-Zaqatala turizm marşrutudur. Bu sahədə rayonumuzda sahibkarlar tərəfindən xeyli iş görülmüşdür. “Uludağ”, “Yaşıl park”, “Güləşçi”, “İlisu”, “Ulu” istirahət obyektlərinin birinci hissəsi istifadəyə verilmiş, Qaşqaçay, Ləkit və Zərnə kəndlərində də turizmin inkişafı ilə bağlı işlər görülməkdədir.
Sizin proqram xarakterli çıxışlarınızda turizmin ölkəmizin inkişafı üçün ən prioritet sahə kimi qiymətləndirilməsi, yeni Fərmanınızla Mədəniyyət və Turizm Nazirliyinin yaradılması bizim qarşımızda çox mühüm vəzifələr qoyur.
Cənab Prezident!
Sizin rayonumuzda olarkən ictimaiyyətlə görüşünüz zamanı söylədiyiniz proqram xarakterli nitqinizdən irəli gələn vəzifələrin yerinə yetirilməsi üçün tədbirlər planı hazırlanmış və icrasına başlanılmışdır. Tədbirlər planında əhalinin içməli su ilə təminatını yaxşılaşdırmaq üçün Qax şəhərinə yeni su xəttinin çəkilişi, kənd yerlərində 30 ədəd artezian quyusunun qazılması, şəhərin kanalizasiya sisteminin yenidən qurulması, kəndlərin qazlaşdırılması, yeni məktəb binalarının, idman kompleksi və qurğularının tikilməsi, məktəblərin, səhiyyə və mədəniyyət obyektlərinin, yolların, şəhərin küçə və səkilərin təmiri və sair nəzərdə tutulmuşdur.
Cənab Prezident!
Qax rayonunun ictimaiyyəti Sizi əmin edir ki, Sizin fərman və sərəncamlarınızın, rayonumuzda olarkən verdiyiniz tapşırıq və tövsiyələrin yerinə yetirilməsi, rayonun sosial-iqtisadi inkişafı üçün bütün imkanlardan səmərəli istifadə olunacaqdır.
Bölmənin digər xəbərləri
