Qazaxda buğda sahələrində orta məhsuldarlıq 35,2 sentner təşkil edir
Qazax, 17 iyul, AZƏRTAC
Qazax rayonunda taxılçılığın inkişafı istiqamətində məqsədyönlü işlər görülür. Dövlətin diqqət və qayğısını hiss edən fermerlər hər il bu sahəyə daha çox maraq göstərirlər. Müasir texnika və zəruri avadanlıqlarla təmin olunan təsərrüfat sahibləri məhsuldarlığın artırılması üçün əkin sahələrini genişləndirirlər.
AZƏRTAC-ın bölgə müxbiri xəbər verir ki, 2026-cı ilin məhsulu üçün rayonda payızlıq və yazlıq olmaqla, ümumilikdə, 11 min 732,8 hektar sahədə taxıl əkilib. Bunun 6950 hektarını arpa, 4782,8 hektarını isə buğda sahələri təşkil edir.
Hazırda rayonda taxıl biçini yekunlaşmaq üzrədir. Aqrotexniki tədbirlərin vaxtında və keyfiyyətlə həyata keçirilməsi nəticəsində zəmilərdə bol məhsul yetişib. Biçinin mütəşəkkil təşkili, işlərin optimal müddətdə başa çatdırılması və təhlükəsizlik qaydalarına əməl olunması üçün bütün hazırlıq işləri görülüb, texnikalar saz vəziyyətə gətirilib.
Bu günədək 4782,8 hektar buğda sahəsinin 3760 hektarında biçin aparılıb. Sahələrdən 13 min 235,2 ton məhsul toplanıb. Orta məhsuldarlıq 35,2 sentner təşkil edir. 6950 hektar arpa sahəsinin isə 6798,5 hektarında biçin başa çatdırılıb. Sahələrdən 21 min 891,2 ton məhsul götürülüb. Orta məhsuldarlıq 32,2 sentnerdir.
Biçin prosesinə 57 kombayn cəlb olunub. Qalan sahələrdə biçin işləri sürətlə davam etdirilir.
Müxbir – Ruslan Novruzoğlu
Bölmənin digər xəbərləri
