CƏMİYYƏT
Qəbələdə növbəti qanvermə aksiyası
Qəbələ, 4 iyul (AZƏRTAC, Şahnəzər Bəşirov). “Hemofiliya və talassemiyadan əziyyət çəkən uşaqlara qayğı” Dövlət Proqramına uyğun olaraq iyulun 4-də Qəbələdə növbəti qanvermə aksiyası təşkil edilmişdir.
AZƏRTAC xəbər verir ki, bu xeyriyyə aksiyası B.Eyvazov adına Respublika Hematologiya və Transfiziologiya İnstitutunun dəstəyi, Qəbələ Rayon İcra Hakimiyyətinin və rayon mərkəzi xəstəxanasının təşkilatçılığı ilə keçirilmişdir.
Qanvermə aksiyasında rayon icra hakimiyyətinin, idarə və təşkilatların kollektivləri, hüquq mühafizə orqanlarının əməkdaşları, eləcə də rayon sakinləri həvəslə iştirak etmişlər.
Tədbirdə 200 nəfərdən çox insan könüllü qan vermişdir. Müxtəlif qan xəstəliklərindən əziyyət çəkən insanlara kömək məqsədilə keçirilən tədbirdə Mərkəzi Qan Bankının əməkdaşları əvvəlcə qan vermək istəyən vətəndaşları müayinə etmişlər.
Aksiya iştirakçılarından tədarük olunan qan və qandan hazırlanan preparatlar hemofiliyalı və talassemiyalı xəstələrin, eləcə də qana ehtiyacı olan insanların müalicəsində istifadə olunacaqdır.