Qırğızıstanda Azərbaycanın Ümummilli Lideri Heydər Əliyevin xatirəsi anılıb
Bakı, 13 dekabr, AZƏRTAC
Görkəmli dövlət xadimi Heydər Əliyevin anım günündə Azərbaycanın Qırğızıstandakı səfiri, Azərbaycan-Qırğızıstan İnkişaf Fondunun həmsədrləri, Azərbaycan xalqının Ümummilli Liderinin adını daşıyan 20 nömrəli məktəb-gimnaziya tədris-tərbiyə kompleksinin şagirdləri və müəllimləri bir dəqiqəlik sükutla onun əziz xatirəsini yad ediblər, foyedə qoyulmuş büstü önünə gül dəstələri düzüblər. Səfir məktəbə Heydər Əliyevin portretini hədiyyə edib.
AZƏRTAC xəbər verir ki, bu barədə “Veçerniy Bişkek”də yazılıb.
Qırğız nəşri xatırladır ki, Ulu Öndərin əziz xatirəsi həm Azərbaycanda, həm də xaricdə böyük hörmətlə anılır. Bu il Prezident İlham Əliyevin Sərəncamına əsasən, Azərbaycanda “Heydər Əliyev İli” elan edilib. May ayında ölkədə və dünyada müasir müstəqil Azərbaycanın memarı və qurucusunun 100 illiyi, dünən isə vəfatının 20 illiyi qeyd olunub.
“Azərbaycan xalqı ölkəmizin tarixində Heydər Əliyev kimi dahi şəxsiyyətin olması ilə fəxr edir. Bu il mühüm hadisələrlə zəngin olub. Bu il həm Ümummilli Liderimizin anadan olmasının 100 illiyi, həm də Azərbaycan Prezidenti İlham Əliyevin ölkəyə rəhbərliyinin 20 illiyi tamam olur. Bu il, həmçinin Azərbaycan xalqının ərazi bütövlüyünü tam bərpa etdiyinə görə tarixə düşəcək. Əlbəttə ki, 2023-cü il ölkələrimiz arasında diplomatik münasibətlərin qurulmasının 30 illiyi kimi də əlamətdardır. Dekabrın 12-də isə biz birlikdə Çingiz Aytmatovun anadan olmasının 95 illiyini qeyd etdik”, - deyə Azərbaycanın Qırğız Respublikasındakı səfiri Lətif Qəndilov nəşrə bildirib.
Səfir diqqətə çatdırıb ki, Heydər Əliyev həm keçmiş İttifaqda, həm Vətənində, həm digər ölkələrdə böyük etimad və hörmət qazanmışdı, çünki o, qlobal miqyaslı vəzifələri həll etməyə qadir olan müdrik siyasi xadim idi. O, hər zaman Azərbaycan üçün çətin olan dövrlərdə xalqın yanında olub. 1993-cü ildə hökumət böhranı fonunda xalq məhz Heydər Əliyevi hakimiyyətə dəvət etməyi tələb etdi. Onun müasir müstəqil Azərbaycanın memarı və qurucusu adlandırılması təsadüf deyil. Məhz o, xalqla birlikdə indiki güclü və müstəqil ölkənin əsasını qoyub. “O, hələ 1969-cu ildə Azərbaycanın Kommunist Partiyasının Mərkəzi Komitəsinin birinci katibi vəzifəsində olarkən Azərbaycanın fenomenal gələcəyinin bünövrəsini qoymuşdu. Onun struktur iqtisadi islahatları, apardığı siyasət Qarabağı azad edənləri yetişdirmək imkanı yaradıb, - deyə səfir Qəndilov vurğulayıb. - Ulu Öndərin “Mən həmişə fəxr etmişəm, bu gün də fəxr edirəm ki, mən azərbaycanlıyam” sözləri dünya azərbaycanlılarının şüarına, xalqın həmrəyliyinin təməl daşına çevrilib. Ən çətin vaxtlarda o, xalqı inandırıb ki, qələbə istənilən halda bizim olacaq, çünki həqiqət bizim tərəfimizdədir. Onun sözləri bizi qələbədən-qələbəyə aparıb”.
Diplomat deyib ki, 2020-ci ildə Şuşa şəhəri azad olunanda Prezident İlham Əliyev, ilk növbədə, Azərbaycanın Ümummilli Liderinin məzarını ziyarət etdi və dedi ki, o, atasının vəsiyyətini yerinə yetirdi: “Şuşa azaddır. Bu, böyük Zəfərdir!”
“Heydər Əliyev Azərbaycanı məhv olunmaqdan xilas edibsə, İlham Əliyev daha irəli addımlayıb - o, bizdən alınan ərazini qaytardı, ədaləti bərpa etdi. O, Heydər Əliyev kimi, lap əvvəldən qələbəyə və haqlı olduğuna əmin idi”, - deyə diplomat qeyd edib.
“Heydər Əliyevlə işləmək mənə nəsib olub. O, təkcə Azərbaycanın deyil, həm də keçmiş İttifaqın təhsilinə, mədəniyyətinə, incəsənətinə çox böyük töhfə verib. Onun təhsil layihələrindən biri o dövrdə Azərbaycanda tədris olunmayan ixtisaslar üzrə Moskva, Leninqrad və Kiyevə məni və bir neçə soydaşımı təhsil almağa göndərməsi oldu. O, bu layihə ilə çox fəxr edirdi, respublikadan kənarda oxuyan insanların siyahısını göstərərək deyirdi ki, biz ölkənin sərvətiyik. Əlbəttə ki, biz onun gözləntilərini və ümidlərini doğrultmağa çalışırdıq. Bu layihədə iştirak edənlərdən bir çoxları indi dövlət strukturlarında rəhbər vəzifələrdə çalışırlar. Heydər Əliyevin dediyi kimi, biz fəxr edirik ki, azərbaycanlıyıq. Fəxr edirik ki, bizim belə Ümummilli Liderimiz var idi”, - deyə Azərbaycan-Qırğızıstan İnkişaf Fondunun həmsədri İqbal Babayev bildirib.
Qırğızıstan tərəfindən Fondun həmsədri Almaz Mambetov əlavə edib ki, Prezident İlham Əliyev atasının müdrik siyasətini uğurla davam etdirir. “Azərbaycanın nüfuzu durmadan artır və bunların hamısı görkəmli siyasi xadim Heydər Əliyevin yaratdığı bünövrədə baş verir. Onun həyatı timsalında şəxsiyyətin tarixdə necə böyük rol oynadığını dərk etmək mümkündür”, - deyə Almaz Mambetov qeyd edib.
20 nömrəli məktəb-gimnaziya tədris-tərbiyə kompleksinin direktoru Kanıkey Alımkulova vurğulayıb ki, məktəb üçün Heydər Əliyev kimi dahi insanın, əfsanə insanın adını daşımaq böyük şərəfdir. “Hesab edirəm ki, məktəbimiz də onun təhsil layihələrindən biridir. Keçən il şagirdlərimiz Bakıya səfər etdilər, müasir Azərbaycanı gördülər və əsl liderin miqyasını və şəxsiyyətinin gücünü daha çox hiss etdilər. Sizi əmin edirəm ki, məktəbimizin hər bir şagirdi Qırğızıstanın Azərbaycan kimi böyük və etibarlı dostunun olduğunu bilir”, - deyə Kanıkey Alımkulova bildirib.
Bölmənin digər xəbərləri
