Bakı, 8 iyul, AZƏRTAC

Geridə qoyduğumuz həftə Azərbaycan üçün çox uğurlu oldu desək yanılmarıq. Dünyanın aparıcı media qurumlarının diqqəti mötəbər beynəlxalq tədbirə ev sahibliyi edən Bakıda oldu. Paytaxtımızda Qoşulmama Hərəkatının Əlaqələndirmə Bürosunun nazirlər görüşü keçirildi. Xarici dövlətlərin siyasi liderləri, ictimai-siyasi xadimləri ölkəmizə səfərlər etdilər və vacib müzakirələr apardılar. Bütün bunlar Qoşulmama Hərəkatına sədrlik edən Azərbaycanın yürütdüyü düzgün siyasətin, diplomatiyanın uğurlu nəticələrindən xəbər verir.

Bu sözləri AZƏRTAC-a açıqlamasında politoloq Ramiz Alıyev söyləyib.

Onun sözlərinə görə, dünyada koronavirus pandemiyasının, iğtişaşların, münaqişələrin hökm sürdüyü, miqrant axınının gücləndiyi bir vaxtda ölkəmizin dünyada sülhə və sabitliyə, beynəlxalq hüquqa, ədalətə töhfə verəcək bir konfransa ev sahibliyi etməsi Azərbaycanın artan nüfuzunun göstəricisidir. Qoşulmama Hərəkatı son 4 ildə fəaliyyətini gücləndirərək dünyada gedən proseslərdə həlledici rol oynayır. 2019-cu ildən etibarən Hərəkatın toplantılarında Azərbaycan Prezidenti dünya xalqlarını narahat edən siyasi, iqtisadi, hərbi problemlərlə bağlı fundamental təşəbbüslər irəli sürür. Bu təşəbbüslər təkcə üzv ölkələr deyil, digər beynəlxalq təşkilatlar tərəfindən də dəstəklənir. Təşkilata sədrliyimizin ilk ilində Azərbaycan Prezidenti İlham Əliyev dünya ölkələrini pandemiyaya qarşı mübarizədə səfərbərliyə dəvət etdi. Pandemiyaya qarşı mübarizəyə dair BMT Baş Assambleyasının xüsusi iclasının keçirilməsi, “peyvənd millətçiliyi”nin aradan qaldırılması, iqtisadi cəhətdən zəif ölkələrin maraqlarının qorunması Azərbaycan Prezidentinin irəli sürdüyü əsas tezislər idi. Dövlətimiz üzv ölkələrə pandemiyaya qarşı mübarizə çərçivəsində maliyyə və texniki yardımlar göstərdi. Keçən 4 il ərzində Azərbaycan Təşkilata sədrlik edən ölkə kimi üzv dövlətlərin maraqlarını beynəlxalq səviyyədə qətiyyətlə qorudu.

“Son 4 il ərzində Azərbaycanın rəhbərliyi ilə Qoşulmama Hərəkatı dünyada səsi eşidilməyən, dinlənilməyən ölkələrin əsas tribunasına çevrildi. Qoşulmama Hərəkatının Əlaqələndirmə Bürosunun nazirlərin toplantısı Azərbaycan Prezidenti tərəfindən müəyyən edilmiş gündəlik və müzakirə üçün seçilmiş mövzuların aktuallığı ilə diqqət cəlb etdi. “Qoşulmama Hərəkatı: meydana çıxan çağırışlarla mübarizədə birgə və qətiyyətli” adı altında keçirilən nazirlər görüşündə Prezident İlham Əliyev olduqca məzmunlu çıxış etdi və qətiyyətli mövqe sərgilədi. Qoşulmama Hərəkatına üzv dövlətlərin BMT Təhlükəsizlik Şurasında təmsil olunmasının vacibliyi, inkişaf etməkdə olan Afrika, Latın Amerikası, Yaxın Şərq və Cənub-Şərqi Asiya ölkələrinə beynəlxalq səviyyədə dəstəyin artırılması, beynəlxalq siyasətdə ikili standartların aradan qaldırılması, neomüstəmləkəçiliyin hər cür formasının pislənilməsinin zəruri olduğunu bildirən Prezident İlham Əliyev üzv dövlətləri bu istiqamətlərdə öz səylərini birləşdirməyə çağırdı. Dövlətimizin başçısı BMT Təhlükəsizlik Şurasının üzvü Fransanın misalında güc sahibi olan dövlətlərin hələ də digər xalqların təbii resurslarını talamaq və fundamental haqlarını əlindən almaq cəhdlərini birmənalı şəkildə pislədi. Azərbaycan Prezidenti Fransa Respublikasını vaxtilə müstəmləkə ölkələrində apardığı soyqırımı cinayətlərinə görə zərərçəkmiş xalqlardan üzr istəməyə və xalqların azadlıq və müstəqillik arzusuna qarşı hərəkətlərdən çəkinməyə çağırdı. Riyakarlıq və ikili standartların təzahürü olan Fransa Korsika dilinə qadağa qoyduğu və etnik azlıqlar konsepsiyasını qəbul etmədiyi halda, Azərbaycandakı erməni milli azlığını qızışdıraraq separatizmə sürükləyir. Fransa Azərbaycan torpaqlarında separatizmi dəstəkləməklə Cənubi Qafqaz regionunda sülhə və sabitliyə mane olur”, - deyə R.Alıyev vurğulayıb.

Politoloq əlavə edib ki, Azərbaycan Qoşulmama Hərəkatına rəhbərlik etdiyi bir dönəmdə 30 il işğal altında olan Qarabağı azad etdi. 2020-ci və 2022-ci illərdə Qoşulmama Hərəkatı ölkələri BMT Təhlükəsizlik Şurasında Azərbaycan əleyhinə olan birtərəfli və qərəzli bəyanatların qəbul edilməsinin qarşısını alıblar. Bu, Qoşulmama Hərəkatının qətiyyətli, ədalətli, beynəlxalq hüququn norma və prinsiplərinə əsaslanan adekvat reaksiyasının nəticəsi olaraq, qazanılmış uğurdur. BMT-dən sonra ikinci böyük təsisat kimi tanınan Qoşulmama Hərəkatı yenidən formalaşan dünya nizamında fəallığını daha da artıracaq. BMT Təhlükəsizlik Şurasında daha çox ölkənin təmsil olunması və dünya dövlətlərinin əksəriyyətinin maraqlarına cavab verən formatda fəaliyyət göstərməsi günümüzün tələblərindən biridir. Qoşulmama Hərəkatının ötən 4 ildə dünyada gedən qlobal proseslərdə oynadığı rol bütün dünya ölkələri tərəfindən təqdir olunur.