Quba Soyqırımı Memorial Kompleksində anım tədbiri keçirilib
Quba, 25 fevral, Elxan Yusifli, AZƏRTAC
Xocalı soyqırımı ilə bağlı beynəlxalq səviyyədə məlumatlılığın artırılmasında, bu faciənin dünya ictimaiyyəti tərəfindən tanınmasında Heydər Əliyev Fondunun təşkilatçılığı ilə dünyanın bir çox ölkəsində davamlı olaraq həyata keçirilən “Xocalıya ədalət!” kampaniyasının mühüm rolu var. Kampaniya nəticəsində 18 dövlətin qanunvericilik orqanı, ABŞ-ın 24 ştatı, eləcə də İslam Əməkdaşlıq Təşkilatı və Türk Dövlətləri Təşkilatı tərəfindən bu qəddar qətliam pislənib və soyqırımı kimi qiymətləndirilib. Bununla bağlı müvafiq qərar və qətnamələr qəbul edilib.
AZƏRTAC-ın bölgə müxbiri xəbər verir ki, bu barədə fevralın 25-də Qubada Konstitusiya və Suverenlik İli, azərbaycanlılara qarşı soyqırımının 107-ci və Xocalı soyqırımının 33-cü ildönümü ilə əlaqədar keçirilən "Xocalı soyqırımı: insanlıq əleyhinə cinayət" adlı anım tədbirində edilən çıxışlarda bildirilib.
Quba Rayon İcra Hakimiyyətinin, Yeni Azərbaycan Partiyasının Quba rayon təşkilatının, Azərbaycan Respublikası İnsan Hüquqları üzrə Müvəkkilin - Ombudsmanın Şimal Regional Mərkəzinin və Quba şəhərində Soyqırımı Memorial Kompleksinin təşkil etdiyi tədbirdə Azərbaycanın suverenlik uğrunda apardığı mübarizənin tarixi, xalqımıza qarşı törədilmiş soyqırımlarının, o cümlədən Xocalı soyqırımının beynəlxalq səviyyədə tanıdılması və bu hadisələrin milli kimliyimizə təsiri geniş müzakirə olunub.
Quba Soyqırımı Memorial Kompleksinin direktoru Rəxşəndə Bayramova bildirib ki, Xocalı hadisələri mülki əhalinin tamamilə məhv edilməsi məqsədilə həyata keçirilən soyqırımı aktıdır. Təkcə Azərbaycan xalqına deyil, bütün bəşəriyyətə qarşı törədilmiş bu soyqırımı cinayəti nəticəsində 613 Xocalı sakini, o cümlədən 63 uşaq, 106 qadın və 70 ahıl şəxs amansızlıqla qətlə yetirilmiş, şəhərin 5379 nəfər sakini zorakılıqla qovulub. Eyni zamanda, həmin vaxt girov götürülmüş 1275 sakindən 150 nəfərin, o cümlədən 68 qadının və 26 uşağın taleyi hələ də naməlum olaraq qalmaqdadır.
Tədbirdə Abbasqulu Ağa Bakıxanov adına Tarix və Etnologiya İnstitutunun Qafqaz tarixi şöbəsinin müdiri Qasım Hacıyev, Quba Rayon İcra Hakimiyyəti başçısının müavini Səidə Abasova, Yeni Azərbaycan Partiyasının Quba rayon təşkilatının sədr müavini Elxan Məhərrəmov və Ombudsmanın Şimal Regional Mərkəzinin rəhbəri Bəhruz Əfəndiyev çıxış edərək, Xocalı soyqırımının tarixi faktlarla sübut olunmuş və erməni millətçilərinin azərbaycanlılara qarşı apardığı məqsədyönlü etnik təmizləmə siyasətinin ən dəhşətli nümunələrindən biri olduğunu qeyd ediblər.
Bildirilib ki, Azərbaycan xalqının XX əsrdə üzləşdiyi dəhşətli Xocalı faciəsi yalnız Holokost, Xatın, Lidisa, Oradur, Sonqmi soyqırımı kimi insanlıq tarixinə düşmüş qanlı faciələrlə müqayisə oluna bilər. Xocalı faciəsini törətməklə ermənilər xalqımızı qorxutmaq, mübarizə əzmini qırmaq, tarixi torpaqlarımızın bir qisminin itirilməsi ilə barışmağa məcbur etmək istəyirdilər. Lakin hiyləgər düşmən məqsədinə çata bilmədi. Xalqımız öz dövlətinin suverenliyi və ərazi bütövlüyü uğrunda mübarizədə daha da mətinləşdi, qəhrəmanlıq və dəyanət nümayiş etdirdi. Xalqımıza qarşı soyqırımlar törətmiş hərbi cinayətkarlar bu gün Azərbaycan dövləti tərəfindən ədalət məhkəməsi qarşısına çıxarılaraq, layiqli cəzalarını almaları üçün mühakimə edilir.
Tədbirdə Xocalı soyqırımının beynəlxalq arenada tanıdılması məqsədilə Prezident İlham Əliyev tərəfindən həyata keçirilən diplomatik və hüquqi istiqamətli işlər iştirakçıların diqqətinə çatdırılıb.
Bölmənin digər xəbərləri
