Qubada dövlət suverenliyi və milli birliyin qorunmasının ideoloji əsaslarına dair tədbir keçirilib
Bakı, 27 sentyabr, AZƏRTAC
Qeyri-Hökumət Təşkilatlarına Dövlət Dəstəyi Agentliyinin dəstəyi ilə Bakı Politoloqlar Klubu tərəfindən Quba Rayonu İcra Hakimiyyətinin və Azərbaycan Dövlət Pedaqoji Universitetinin (ADPU) Quba filialının tərəfdaşlığı ilə “Konstitusiya və Suverenlik İli” çərçivəsində “Dövlət suverenliyi və milli birliyin qorunmasının ideoloji əsaslarının təhlili” adlı tədbir keçirilib.
Bakı Politoloqlar Klubundan AZƏRTAC-a bildirilib ki, tədbirin keçirilməsində məqsəd dünyada və region ətrafında bir sıra çağırışlar fonunda yerli gənclərin düzgün formada istiqamətləndirilməsinə dəstək vermək, azərbaycançılıq, dövlət–vətəndaş, xarici qüvvələr kimi anlayışlarla bağlı, eyni zamanda, milli-mənəvi dəyərlər, mədəni assimilyasiya, rəqəmsal əsrdə milli kimliyin qorunması və qarşıda duran çağırışlar, Azərbaycana qarşı ideoloji müharibə və digər məsələlərlə bağlı maarifləndirmə işinin aparılmasından ibarətdir.
Tədbiri açan ADPU Quba filialının direktoru professor Yusif Alıyev mövzunun aktuallığına toxunub, bu kimi maarifləndirmə işlərinin xüsusilə həmsərhəd rayonlarda vacib olduğunu qeyd edib. O, şimal bölgəsində gənclərin təhsilə və elmə yönəldilməsində ADPU-nun Quba filialının roluna da diqqət çəkib. Yusif Alıyev Ümummilli Lider Heydər Əliyevin hələ müstəqilliyimizin ilk illərində ölkəmizdə müəyyən etdiyi təhsil strategiyasını milli sərvət kimi dəyərləndirib. Direktor diqqətə çatdırıb ki, bu strategiyanın Prezident İlham Əliyev tərəfindən uğurla davam etdirilməsi Azərbaycanın çoxşaxəli inkişafında, eyni zamanda, 44 günlük Vətən müharibəsində rəşadətli Qələbənin qazanılmasında öz sözünü deyib.
Quba Rayon İcra Hakimiyyəti başçısının müavini Səidə Abbasova belə seminarların gənc nəslin milli dəyərlərə bağlılığının möhkəmləndirilməsinə mühüm töhfə verdiyini qeyd edib.
Bakı Politoloqlar Klubunun sədri Zaur Məmmədov Qubada gənclərin ayrı-ayrı sosial qruplarını təşkil edən 100 nəfərə yaxın iştirakçının dinlədiyi seminarın vacibliyinə toxunub, hazırda ölkəmiz ətrafında cərəyan edən çağırışlar, formalaşan perspektivlər haqqında bəhs edib. O, Ulu Öndər Heydər Əliyev tərəfindən əsası qoyulmuş və Prezident İlham Əliyevin davam etdirdiyi ideoloji siyasətin əsas istiqamətləri haqqında bəhs edərək ölkəmizin bu gün dünyada vacib yer tutduğunu xüsusilə vurğulayıb.
Milli Məclisin deputatı Əlibala Məhərrəmzadə çıxışında Azərbaycanın iqtisadi və siyasi göstəriciləri haqqında ətraflı məlumat verib. O qeyd edib ki, bu gün dünyada baş verən proseslərdə Azərbaycan xüsusi əhəmiyyətə malikdir. Prezident İlham Əliyevin uğurlu daxili və xarici siyasəti nəticəsində Azərbaycan xalqı və dövləti uzun əsrlərdən sonra bölgədə işğala son qoyaraq tarixi ədaləti bərpa edib. Əldə olunan uğurlar yalnız hərbi deyil, həm də diplomatik, siyasi və iqtisadi sahələrdə kompleks yanaşmanın nəticəsidir.
Sonra çıxış edən deputat Müşfiq Məmmədli ölkə rəhbərliyi tərəfindən həyata keçirilən islahatların, xüsusən də sosial və humanitar sahədə atılan addımların əhəmiyyətini qeyd edib. O, Azərbaycanda aparılan regional siyasətdən, regionların inkişaf planından, eləcə də gənclərin dövlət siyasətindəki rolundan danışaraq, gələcək nəsillərin milli maraqlara sadiq və müasir dünyagörüşünə malik vətəndaşlar kimi formalaşmasının vacibliyini vurğulayıb.
Politoloq Zaur İbrahimli isə konfrans iştirakçıları ilə mədəni assimilyasiya təhlükələri, rəqəmsal əsrdə milli kimliyin qorunması, qarşıda duran çağırışlar və Azərbaycana qarşı aparılan ideoloji müharibə mövzularında geniş fikir mübadiləsi aparıb. O, xüsusilə şimal regionlarının gənclərinin diqqət yetirməli olduqları məqamları ön plana çəkib, vətəndaş – dövlət həmrəyliyi kimi dəyərlərin qlobal informasiya mühitində qorunmasının strateji əhəmiyyət kəsb etdiyini bildirib.
ADPU-nun Quba filialının Humanitar elmlər kafedrasının müəllimi, Əməkdar mədəniyyət işçisi Elza Orucova çıxışında bölgənin zəngin mədəni mühitinin təhsillə sintezinin gələcək nəsillərin milli kimlik və vətənpərvərlik ruhunda yetişməsinə töhfə verdiyini vurğulayıb.
Filialın Akt zalında keçirilən seminar baş müəllim Kəmalə Bayramovanın moderatorluğu ilə baş tutub.
Bölmənin digər xəbərləri
