QUŞÇULUQ MƏHSULLARININ NÖVBƏTİ SATIŞ-YARMARKALARI KEÇİRİLMİŞDİR
AZƏRTAC xəbər verir ki, oktyabrın 5-də Bakı şəhərində “Təzə bazar” MMC-nin, 6 nömrəli ticarət mərkəzinin, Sabunçu və Badamdar qəsəbələrinin ərazilərində quşçuluq məhsullarının növbəti satış-yarmarkaları keçirilmişdir.
İqtisadi İnkişaf Nazirliyinin və Quşçular Cəmiyyətinin birgə təşkil etdikləri yarmarkalar paytaxt əhalisinin bu məhsullara tələbatının daha dolğun ödənilməsi və qiymətlərin süni şəkildə artırılmasının qarşısının alınması məqsədilə həyata keçirilir.
“Təzə bazar” MMC-nin ərazisindəki yarmarkada alıcılara İmişli, Hacıqabul, Xızı, Giləzi və digər rayonların quşçuluq müəssisələrinin məhsulları - toyuq əti və yumurta təklif olunurdu.
İmişli broyler fabrikinin işçisi Faiq Əhmədov satışa 400 kiloqram toyuq əti gətirdiyini və kiloqramını növlərinə görə 2 manat 20 qəpiyə - 2 manat 60 qəpiyə, Goradil quşçuluq fabrikinin nümayəndəsi Rahib İgidov 50 min yumurtanın birini 11 qəpiyə, qəfəsini 3 manat 30 qəpiyə təklif etdiklərini bildirmişlər.
Şəhər sakinləri quş ətinin və yumurtanın bazar qiymətlərindən ucuz olduğunu razılıqla qeyd edirdilər.
İqtisadi İnkişaf Nazirliyi mətbuat xidmətinin rəhbəri Abbas Əliyev bildirdi ki, bu gün şəhərin yarmarkalarında satışa 20 ton toyuq əti və 500 min ədədə yaxın yumurta çıxarılmışdır. Satış-yarmarkalar şənbə və bazar günləri də davam etdiriləcəkdir.
Bölmənin digər xəbərləri
