Hörmətli nazirlər, xanımlar və cənablar!

Zəngin mədəni və mənəvi irsə malik olan qonaqpərvər, qədim Azərbaycan torpağında 12-ci ildir ki, informasiya və kommunikasiya texnologiyalarına həsr olunmuş ənənəvi beynəlxalq sərgi-konfransı keçirilir. Builki sərgi-konfrans öz miqyasına görə əvvəlkilərdən daha çox fərqlənir. Sərgi və konfransın işində 23 ölkədən 110 şirkət və 500-dən çox mütəxəssis iştirak edir. Sərgiyə gələnlərin sayının isə təqribən 20 min nəfər olacağı gözlənilir. Bu tədbir ərəfəsində respublikamızın paytaxtı Bakı şəhərində həm də Azərbaycan-ABŞ biznes forumu və BMT-nin yenicə yaradılmış informasiya cəmiyyəti üzrə Qlobal Alyansının birinci regional iclası keçirilir.

Bu sərgi və konfrans əvvəlkilərdən xüsusi bir cəhəti ilə də fərqlənir. Belə ki, ümummilli liderimiz Heydər Əliyevin əsasını qoyduğu və cənab Prezident İlham Əliyev tərəfindən müvəffəqiyyətlə davam etdirilən uğurlu neft strategiyası nəticəsində böyük inam və neft ölkəsi kimi nüfuz qazanmış və son zamanlar iqtisadi inkişaf dinamikası ilə bütün dünyanın diqqətini özünə cəlb edən Azərbaycanda keçirilən bu tədbir ölkə iqtisadiyyatının yeni bir inkişaf istiqamətinin başlandığını göstərir.

Azərbaycanda bir çox sahələrdə olduğu kimi, rabitə və informasiya texnologiyaları sahəsində də sürətli inkişaf müşahidə olunur. İnformasiya- kommunikasiya texnologiyaları enerji sektorundan sonra Azərbaycan iqtisadiyyatının ən dinamik inkişaf edən sahəsidir. Burada illik artım təxminən 35-40 faiz olmaqla, dünya üzrə orta göstəricidən təqribən 2-3 dəfə çoxdur. Birbaşa sərmayələrin qoyuluşu ildə təqribən 130-150 milyon ABŞ dolları həcmində olur.

Ölkəmizdə informasiya-kommunikasiya texnologiyalarının inkişafı milli strategiya və dövlət proqramı əsasında həyata keçirilir. Bu sahədə aparılan islahatlar son illərdə gücləndirilmişdir. Özəlləşdirmə davam etdirilir, bazarda liberallaşma aparılır və mərhələlərlə sərbəst tənzimləyici qurumun yaradılmasına başlanılır. Lakin bu sahədə çalışan alim, mühəndis və mütəxəssislər hesab edirlər ki, informasiya-kommunikasiya texnologiyaları Azərbaycan iqtisadiyyatına daha çox töhfələr verə və iqtisadiyyatın lokomotivi ola bilər.

Hörmətli cənab Prezident!

Sizin “Azərbaycanda neftlə neftsiz iqtisadiyyat qurulmalıdır” kimi tələbinizə texnoloji tutumlu iqtisadiyyat qurmaq istəyənlərin cavabı bu möhtəşəm tədbirdən başlanır. Sərgi-konfransın işində, habelə bu günlər ərzində keçiriləcək ikitərəfli görüşlərdə biz xarici həmkarlarımızla birlikdə Azərbaycanda və regionda informasiya-kommunikasiya texnologiyalarının geniş tətbiqi, iqtisadi inkişafa və regional əməkdaşlığa təsirinə dair digər vacib problemləri müzakirə və təhlil edib tövsiyələr hazırlayacağıq. Bu baxımdan hesab edirik ki, sərgi çərçivəsində keçirilən “Xüsusi iqtisadi zonalar – Azərbaycanda dayanıqlı iqtisadi inkişafın yeni istiqaməti” mövzusunda beynəlxalq konfransın da nəticələri təkcə ölkəmiz üçün deyil, iqtisadi inkişafında təbii sərvətlərə əsaslanan ölkələr üçün də əhəmiyyətli olacaqdır.

Etiraf etməliyik ki, texnoloji zonalar əksər ölkələrdə yaradılır və bu layihələr heç də hər yerdə müvəffəqiyyətlə nəticələnmir. Bu səbəbdən də daxili və xarici şirkətlər bu sahəyə böyük həcmli sərmayələrin qoyulmasından ehtiyatlanırlar. Lakin ölkəmizin uğurlu neft strategiyasında qazandığı beynəlxalq iqtisadi nüfuzu, region bazarlarının informasiya texnologiyalarına artan tələbatı, Azərbaycan hökumətinin sərmayə risklərini bölüşmək istəyi və ən nəhayət, Azərbaycan Prezidentinin son illər qazandığı nüfuz, ona olan beynəlxalq inam və etibar yüksək texnologiyalar üzrə xüsusi iqtisadi zonaların Azərbaycan modelinin uğurlu olacağına zəmanət verir.

Hörmətli sərgi və konfrans iştirakçıları!

Sizin arzu və istəyinizlə, Azərbaycanda texnoloji tutumlu yeni iqtisadi inkişafın təşəbbüskarı və təminatçısı, gələcək irimiqyaslı layihələrimizin müvəffəqiyyətlərini və məsuliyyətini bizimlə qətiyyətlə bölüşən, bu sərgi və konfransın keçirilməsinə yüksək diqqət və qayğı göstərən Azərbaycan Prezidenti cənab İlham Əliyevdən öz dəyərli fikir və tövsiyələrini bizimlə bölüşməsi xahiş olunur.

X X X

Prezident İlham Əliyev mərasimdə nitq söylədi.

X X X

“İTE Group PLC” şirkətinin direktoru CEREMİ HANLİ sərgi-konfransın təşkilatçıları adından Prezident İlham Əliyevə təşəkkür edərək dedi ki, 23 ölkədən gəlmiş şirkətlərin burada iştirakının əsas səbəbi Azərbaycanın gündən-günə yüksələn iqtisadiyyatı və gələcək perspektivləridir. Sizin rəhbərliyinizilə Azərbaycanda çox güclü və gözəl siyasət həyata keçirilir ki, bu da Azərbaycanın parlaq gələcəyinin zəminidir. Builki sərgi-konfrans da Sizin siyasətinizin yerinə yetirilməsi sahəsində atılan bir addım olacaqdır. Dəyərli nitqinizə görə çox sağ olun.

X X X

Sonra Prezident İlham Əliyev “Aztelekom” İstehsalat Birliyinin təşkil etdiyi video-konfrans vasitəsilə Naxçıvan Dövlət Universiteti ilə birbaşa əlaqə yaratdı.

Universitetin rektoru, Milli Məclisin deputatı İSA HƏBİBBƏYLİ dövlətimizin başçısına müraciətlə dedi:

- Cənab Prezident, biz Sizi salamlayırıq. Sizin yüksək dəstəyinizlə Bakı şəhərində açılan beynəlxalq sərgi-konfrans informasiya cəmiyyətinə doğru aparan yolda müstəqil Azərbaycanın əldə etdiyi mühüm nəticələri və gələcək perspektivləri cəmiyyətimizə və dünya ictimaiyyətinə təqdim etmək baxımından çox böyük əhəmiyyətə malikdir.

Cənab Prezident, Sizə məlumat verməyi özümə borc bilirəm ki, Naxçıvan Muxtar Respublikasında informasiya texnologiyalarının həyata keçirilməsi sahəsində görülən böyük işlər, o cümlədən Naxçıvan Dövlət Universitetində elektron kitabxananın yaradılması, “Elektron Naxçıvan” proqramının, habelə humanitar informasiya ilə əlaqədar tədbirlərin həyata keçirilməsi, Avropa universitetləri ilə video-konfransların təşkili regionda informasiya texnologiyaları ilə bağlı yeni təfəkkürün formalaşmasına və ən müasir texnologiyanın tətbiqinə marağın artmasına ciddi təkan verir.

Cənab Prezident, Sizin böyük köməyinizlə, qayğınızla çətin şəraitdə suqroptik magistralın Naxçıvan Muxtar Respublikasına çatdırılması regionun iqtisadi blokadadan çıxmasına və universitetimizin beynəlxalq əlaqələrinin genişlənməsinə, hətta burada elektron təhsilin də həyata keçirilməsinə tam təminat verir. Bütün bunlara görə Sizə universitetimizin professor-müəllim heyətinin və tələbə kollektivinin ürəkdən gələn dərin minnətdarlığını çatıdırıram. Sizi əmin edirəm ki, universitetimiz regionda informasiya cəmiyyətini yaradacaq yüksək ixtisaslı yeni nəsil formalaşdırmaq üçün bundan sonra da var qüvvə ilə çalışacaqdır.

Cənab Prezident, çoxcəhətli və məqsədyönlü fəaliyyətinizdə Sizə uğurlar arzulayırıq.

İLHAM ƏLİYEV: Sağ olun. Bütün naxçıvanlılara mənim salamlarımı çatdırın.

X X X

Sonra Prezident İlham Əliyev sərginin pavilyonlarını gəzdi.

Məlumat verildi ki, sərginin ənənəvi iştirakçıları sırasında “Azercell Telecom”, “Azel”, “AzEuroTel”, “Az.StarNet”, “AzTech”, “AzTelekom”, “Bakcell”, “BakTelekom”, “CATEL”, “Delta Telekom”, “İnfoSystems Jet”, “İntrans”, “Logo”, “RSCC”, “The İnternational bank of Azerbaijan”, “Sinam”, “Smart Systems”, “Soliton”, “Teleradio və Ultra Computers” şirkətləri vardır. İştirakçı şirkətlər İKT sahəsində son nailiyyətləri təqdim edərək, istehlakçı ilə ən yeni məlumatları paylaşırlar.

Builki sərgidə ABŞ şirkətlərinin fəallığı xüsusi hiss edilir. Belə ki, ABŞ telekommunikasiya sənayesində fəaliyyət göstərən 15 şirkətlə təmsil olunmuşdur. Bu şirkətlərin eksponatları ABŞ–Azərbaycan Ticarət Sənaye Palatası tərəfindən təşkil olunmuş “ABŞ guşəsi”ndə nümayiş etdirilir.

Dövlətimizin başçısı sərginin əsas bölmələri - Telekommunikasiya və şəbəkələr, İKT və ofis texnologiyaları, simli və simsiz rabitə, Peyk rabitəsi və texnologiyalar, Proqram təminatı və avtomatlaşdırma sistemləri, Elektron Biznes, Elektron Hökumət, Elektron Təhsil və s. ilə yaxından tanış oldu, “BEKO” şirkətinin hazırladığı, çəkisi 1 kiloqram olan və barmaq izləri ilə işləyən özəl nootbuka maraqla baxdı, bunun ölkəmizdə istehsalına və tətbiqinə ehtiyac duyulduğunu bildirdi.

Respublikamızın rəhbəri informasiya texnologiyaları sahəsində xidmət göstərən və telefon aparatları istehsal edən Rusiyanın “İnfosistem Jet”, “Cisco Systems”, Çinin telekommunikasiya avadanlığı istehsal edən “Huavei Texnologies”, dünyada məşhur olan “Siemens” şirkətinin elektron avadanlığına, “Aztex”in nootbuk kolleksiyasına və digər firmaların məhsullarına maraqla tamaşa etdi.

Prezident İlham Əliyev Mingəçevir şəhərindəki “Kür” elektron avadanlığı istehsalı müəssisəsinin xüsusi guşəsi ilə də maraqlandı, əsginasların ödənişi üçün kiosk aparatı vasitəsilə aparılan əməliyyat prosesini izlədi. Bildirildi ki, əsasən mobil, şəhərlərarası rabitə, internet və digər əməliyyatlarda istifadə olunan bu aparat “Sinam” şirkətində sınaq nümunəsi kimi düzəldilmişdir və onun kütləvi istehsalına başlanacaqdır. 2005-ci ildə Rabitə və İnformasiya Texnologiyaları Nazirliyi və “Sinam” şirkəti tərəfindən yaradılmış “Kür” müəssisəsi Cənubi Qafqaz və Mərkəzi Asiyada konveyer üsulu ilə kompyuter istehsal edən ilk müəssisədir. Burada istehsal prosesinin təşkili və yeni yüksək texnoloji məhsulun bazara çıxarılması üzrə Avropa və Tailand təcrübəsi yaxından öyrənilmişdir. Müəssisənin istehsal gücü gündə 140 kompyuter yığmağa imkan verir. Hazır kompyuterlərin testdən keçirilməsi üçün termik kamera quraşdırılmışdır. Hazırda “Kür” və “Hevlett Packard” ticarət markaları altında dünya standartlarına uyğun kompyuterlər yığılır. Məhz buna görə də 2006-cı ilin birinci yarısında müəssisə İSO 9001:2000 keyfiyyət sertifikatına layiq görülmüşdür. Yaxın gələcəkdə digər avadanlığın da istehsalı nəzərdə tutulmuşdur.

Dövlətimizin başçısı ölkəmizdə informasiya texnologiyaları sahəsində yaradılan yeni müəssisələrin dünya standartlarına uyğun avadanlıq istehsal etməsini yüksək qiymətləndirdi, daxili tələbat ödənildikdən sonra məhsulun xarici bazara da çıxarılmasının zəruriliyini vurğuladı və bildirdi ki, İKT sektorunun inkişafına dövlət tərəfindən hər cür kömək göstəriləcəkdir.