REGİONAL MÜNAQİŞƏLƏR YALNIZ SÜLH YOLU İLƏ,DÖVLƏTLƏRİN ƏRAZİ BÜTÖVLÜYÜ ÇƏRÇİVƏSİNDƏ HƏLL OLUNMALIDIR
Stavropol diyarı Dövlət Dumasının ölkəmizdə səfərdə olan deputatı Anatoli Baturin AZƏRTAC-ın müxbirinə müsahibə vermişdir. O demişdir: Azərbaycana səfərdən məqsəd bu ölkənin parlamenti ilə əlaqələri inkişaf etdirmək, qanunvericilik təcrübəsini öyrənməkdir. Milli Məclisin aqrar və sosial siyasət daimi komissiyalarının sədrləri ilə görüşlərdə aqrar islahatlar, sosial və aqrar sahə ilə bağlı qəbul olunmuş qanunlar, hər iki tərəfin problemləri barədə fikir mübadiləsi aparmışıq. Bu gün həm Azərbaycan, həm də Stavropol diyarı bir sıra problemlərlə üzləşiblər. Bizim diyar çeçen yaraqlılarının, Azərbaycan isə erməni silahlı qüvvələrinin təcavüzünə məruz qalmışdır. İstərdik ki, Dağlıq Qarabağ münaqişəsi tezliklə Azərbaycanın ərazi bütövlüyü və beynəlxalq hüquq normaları çərçivəsində öz həllini tapsın. Hesab edirəm ki, bu cür regional münaqişələr, bizə yalnız ziyan gətirir. Bu qəbildən olan problemlər əlaqələrimizin inkişafına mənfi təsir göstərir. Ümid edirəm ki, tezliklə Azərbaycan və Stavropol münaqişələrdən azad olacaq və bizim əlaqələrimiz daha da genişlənərək inkişaf edəcəkdir.
Bölmənin digər xəbərləri
