REGİONLARIN SOSİAL-İQTİSADİ İNKİŞAFI DÖVLƏT PROQRAMINDA NƏZƏRDƏ TUTULAN TƏDBİRLƏR CƏLİLABADDA UĞURLA YERİNƏ YETİRİLİR
AZƏRTAC-ın müxbiri xəbər verir ki, bu fikir Cəlilabad Rayon İcra Hakimiyyətinin 2007-ci ilin sosial-iqtisadi inkişafının yekunları və qarşıda duran vəzifələrə həsr olunmuş şura yığıncağında səslənmişdir.
Yığıncağın iştirakçıları əvvəlcə şəhərin mərkəzi meydanında ümummilli liderimiz Heydər Əliyevin abidəsinin önünə gül dəstələri düzərək böyük öndərin xatirəsini ehtiramla yad etmiş, Heydər Əliyev muzeyində dahi şəxsiyyətin şərəfli ömür yolunu əks etdirən eksponatlarla, mədəniyyət evinin foyesində rayonda istehsal olunan kənd təsərrüfatı və sənaye məhsullarının sərgisi ilə tanış olmuşlar.
Yığıncaqda Cəlilabad Rayon İcra Hakimiyyətinin başçısı Əziz Əzizov hesabat məruzəsi ilə çıxış etmişdir.
Prezident İlham Əliyevin gərgin əməyi, səmərəli fəaliyyəti, məqsədyönlü siyasəti nəticəsində Azərbaycanda iqtisadiyyatın bütün sahələrində dinamik inkişafın təmin olunduğunu bildirən icra başçısı, 2007-ci ildə rayonun sosial-iqtisadi inkişafının yekunları, əldə olunmuş nailiyyətlər, yol verilmiş nöqsanlar və mövcud promlemlər, onların aradan qaldırılması üçün nəzərdə tutulan tədbirlərdən danışmış, 2008-ci ildə qarşıda duran vəzifələri diqqətə çatdırmışdır.
Qeyd olunmuşdur ki, 2007-cı ildə rayonda ümumi daxili məhsulun həcmi əvvəlki illə müqayisədə 30,1 faiz, əmtəə dövriyyəsinin həcmi 40,3 faiz artmış, hər işçiyə düşən orta aylıq əmək haqqı 132 manata çatdırılmış, 2022 yeni iş yeri açılmışdır.
Regionların sosial-iqtisadi inkişafı Dövlət Proqramında nəzərdə tutulan tədbirlərin icrası istiqamətində rayonda həyata keçirilən tədbirlər barədə iştirakçılara məlumat verən məruzəçi, hesabat ilində Cəlilabad şəhərində 9 hektar sahəni əhatə edən 3 parkın salındığını, Zərifə Əliyeva adına orta məktəbin, «Xalqbank»ın rayon filialının, xalça, trikotaj və nişasta sexlərinin istifadəyə veildiyini, avtovağzalın, qonaq evinin, rayon mədəniyyət evinin, dairə seçki komissiyalarının inzibati binalarının əsaslı təmir olunduğunu diqqətə çatdırmışdır.
Tənqid və özünütənqid şəraitində keçən yığıncaqda çıxış edənlər 2007-ci ildə rayonun sosial-iqtisadi inkişafında əldə olunmuş nailiyyətlərlə yanaşı, yol verilmiş nöqsanları da ətraflı təhlil etmiş, mövcud problemlerlə bağlı təkliflərini bildirmiş, bu il ölkəmizdə keçiriləcək Prezident seçkilərində cəlilabadlıların İlham Əliyevin namizədliyini dəstəkləyəcəklərini bildirmişlər.
Yığıncaqda Milli Məclisin deputatı Fəzail İbrahimli, Dövlət Əmlakının İdarə Edilməsi üzrə Dövlət Komitəsinin sədri Kərəm Həsənov çıxış etmişlər. Onlar 2007-ci ildə ölkəmizin sosial-iqtisadi inkişafının əsas göstəriciləri barədə danışmış, ümummilli liderimiz tərəfindən əsası qoyulmuş daxili və xarici siyasətin Prezident İlham Əliyev tərəfindən yeni tarixi şəraitə uyğun uğurla davam etdirildiyini vurğulamış, bunun nəticəsində ölkəmizin regionda lider dövlətə çevrildiyini diqqətə çatdırmışlar. Natiqlər regionların sosial-iqtisadi inkişafı Dövlər Proqramında nəzərdə tutulan tədbirlərin həyata keçirilməsi ilə bölgələrdə işsizliyin aradan qaldırıldığını, yoxsulluğun azaldıldığını xatırlatmışlar. Bildirilmişdir ki, sahibkarlığın inkişaf etdirilməsi, sosial infrastrukturun təkmilləşdirilməsi sahəsində irimiqyaslı layihələrin reallaşdırılmasına imkanlar yaranmışdır. Dövlət Proqramında nəzərdə tutulan tədbirlərin Cəlilabad rayonunda uğurla yerinə yetirildiyi yüksək qiymətləndirilmişdir.
Yığıncaqda Prezident İlham Əliyevə müraciət qəbul edilmişdir.
Hesabat yığıncağında Milli Məclisin deputatları Aydın Həsənov, Mirkazım Kazımov, Prezidentin İcra Aparatının məsul əməkdaşı Mikayıl Hüseynov iştirak etmişlər.
Bölmənin digər xəbərləri
