Rektor müşaviri: BDU gələcəyin şəhər problemlərinə innovativ həllər təklif edir
Bakı, 19 may, AZƏRTAC
Bakı Dövlət Universitetində (BDU) fənlərarası təhsil istiqaməti son illərdə universitetin inkişaf strategiyasının prioritetlərindən biri kimi formalaşdırılır. Müasir dövrdə şəhərlərin idarə olunması, dayanıqlı inkişaf, rəqəmsallaşma və ekoloji problemlər yalnız bir elm sahəsinin çərçivəsində həll edilə bilmədiyi üçün BDU-da da multidisiplinar yanaşmaların tətbiqinə xüsusi önəm verilir. Xüsusilə “ağıllı şəhər” və “yaşıl şəhər” konsepsiyaları ilə bağlı kadr hazırlığı universitetin müxtəlif fakültələri və ixtisasları arasında əməkdaşlıq modeli əsasında inkişaf etdirilir.
Bu fikirləri AZƏRTAC-a müsahibəsində BDU rektorunun keyfiyyət təminatı üzrə müşaviri Asiman İlyasov deyib. O bildirib ki, hazırda universitetdə informasiya texnologiyaları, kompüter elmləri, süni intellekt, ekologiya, coğrafiya, iqtisadiyyat, hüquq, energetika, şəhərsalma və sosial elmlər istiqamətlərini birləşdirən tədris və tədqiqat yanaşmaları genişləndirilir: “Məqsəd tələbələrə yalnız nəzəri bilik vermək deyil, onları real şəhər problemlərini analiz edə və innovativ həllər təklif edə biləcək peşəkar mütəxəssislər kimi formalaşdırmaqdır. BDU-da “ağıllı şəhər” anlayışı çərçivəsində rəqəmsal idarəetmə, məlumatəsaslı qərarvermə, süni intellektin tətbiqi, ağıllı nəqliyyat sistemləri, rəqəmsal xidmətlər və kibertəhlükəsizlik kimi istiqamətlərə xüsusi diqqət ayrılır. “Yaşıl şəhər” konsepsiyası çərçivəsində isə iqlim dəyişiklikləri, ekoloji təhlükəsizlik, yaşıl enerji, enerji səmərəliliyi, tullantıların idarə olunması və dayanıqlı urbanizasiya məsələləri tədris və elmi fəaliyyətin mühüm komponentinə çevrilib. Bu istiqamətdə tələbələrin bilik və bacarıqlarının artırılması məqsədilə müxtəlif tədris modulları, seçmə fənlər, elmi layihələr, seminarlar, beynəlxalq konfranslar və təlim proqramları həyata keçirilir. Universitetdə tələbələrin layihəəsaslı və tətbiqyönümlü təhsil imkanlarının genişləndirilməsi üçün praktiki fəaliyyətlərə üstünlük verilir. Tələbələr müxtəlif tədqiqat layihələrinə cəlb olunur, beynəlxalq proqramlarda iştirak edir və müasir şəhər problemlərinə dair innovativ həllər üzərində işləyirlər”.
Asiman İlyasov qeyd edib ki, BDU beynəlxalq əməkdaşlığa böyük önəm verir: “Xarici universitetlər, beynəlxalq təşkilatlar və sənaye tərəfdaşları ilə əməkdaşlıq çərçivəsində qabaqcıl dünya təcrübəsinin öyrənilməsi və tətbiqi istiqamətində işlər aparılır. Bu əməkdaşlıqlar həm akademik mübadilə imkanlarının genişlənməsinə, həm də müasir kurikulumların hazırlanmasına mühüm töhfə verir. Növbəti illərdə isə “ağıllı və yaşıl şəhərlər” istiqamətində fəaliyyətin daha da genişləndirilməsi planlaşdırılır. Bu çərçivədə yeni fənlərarası magistr proqramlarının yaradılması, ikili diplom imkanlarının artırılması, şəhər innovasiyaları və dayanıqlı inkişaf üzrə tədqiqat mərkəzlərinin fəaliyyətinin gücləndirilməsi nəzərdə tutulur. Eyni zamanda, universitetdə rəqəmsal laboratoriyaların, innovasiya və startap mühitinin inkişaf etdirilməsi planlaşdırılır ki, bu da tələbələrin yaradıcı və innovativ potensialının üzə çıxarılmasına xidmət edəcək. Gələcək dövrdə dövlət qurumları, bələdiyyələr, özəl sektor və beynəlxalq təşkilatlarla əməkdaşlıq vasitəsilə real şəhər problemlərinə yönəlmiş praktiki həllərin hazırlanması əsas prioritetlərdən biri olacaq. Universitet şəhərlərin dayanıqlı inkişafı ilə bağlı elmi nəticələrin praktikaya tətbiqini gücləndirməyi, cəmiyyət və sənaye ilə əlaqələri daha da inkişaf etdirməyi hədəfləyir. BDU-nun əsas məqsədi yalnız akademik biliklərə malik məzunlar yetişdirmək deyil, eyni zamanda, gələcəyin dayanıqlı, rəqəmsal, innovativ və insanmərkəzli şəhərlərinin qurulmasına töhfə verə biləcək müasir düşüncəli, çevik və beynəlxalq rəqabətqabiliyyətli kadr potensialı formalaşdırmaqdır”.
Müxbir – Aysel Azadqızı
Bölmənin digər xəbərləri
