RƏNGLƏRİN DİLİNDƏ...
“YURDUMUZA BAHAR GƏLİR”
Martın 18-də Mədəniyyət Nazirliyinin, Rəssamlar İttifaqının, Türkiyənin Azərbaycandakı səfirliyinin, Dövlət Teleradio Şirkətinin birgə təşəbbüsü ilə Vəcihə Səmədova adına Sərgi salonunda “Yurdumuza bahar gəlir” uşaq yaradıcılıq sərgisinin açılış mərasimi olmuşdur.
Rəssamlar İttifaqının katibi, əməkdar incəsənət xadimi Ağaəli İbrahimov AZƏRTAC-ın müxbirinə demişdir ki, mərasimdə xalq rəssamı Fərhad Xəlilov, Türkiyə səfirliyinin mədəniyyət müşaviri Hafiz Şahin, “Səhər” musiqili-informasiya proqramının rəhbəri, BDU-nun dosenti Qulu Məhərrəmli, Respublika İncəsənət Gimnaziyasının direktoru Yusif Məmmədov və başqaları çıxış edərək, sərgidə nümayiş etdirilən və rəngarəng boyalarının dilində yurdumuza baharı gətirən, təbiətin oyanışını, varlığın yenidən canlanmasını müjdələyən tabloların yaradıcılıq xüsusiyyətlərindən danışmış, gənc rəssamların uğurlarından söz açmışlar.
Qeyd olunmuşdur ki, artıq dördüncü dəfə keçirilən və ənənəyə çevrilən uşaq-bədii yaradıcılıq müsabiqəsində rəngkarlıq, qrafika və tətbiqi sənət nominasiyalarında 6 yaşından 10 yaşınadək və 10 yaşından 16 yaşınadək 800-dən çox məktəbli iştirak etmişdir. Gənc rəssamların 430 ən yaxşı rəngkarlıq və qrafika işi bəyənilmişdir. Birinci yeri tutan 20 gənc rəssam sərginin qalibi diplomuna, 15 nəfər həvəsləndirici mükafata layiq görülmüşdür. 10 müəllimin əməyi isə “Ən yaxşı rəssam-pedaqoq” diplomu ilə qiymətləndirilmişdir.
Sərgi martın 28-dək davam edəcəkdir.
Bölmənin digər xəbərləri
