Respublikanın Baş Prokurorluğu və Daxili işlər nazirliyi cinayətkarlığa, onun təhlükəli növlərinə qarşı mübarizə, o cümlədən geniş ictimai əks-səda doğuran adam oğurluğu cinayətləri törətmiş şəxslərin ifşa edilərək məsuliyyətə cəlb olunması istiqamətində istintaq-əməliyyat tədbirlərini davam etdirirlər.

İnsan hüquq və azadlıqlarına qəsd kimi ən ağır cinayətlərdən sayılan, cəmiyyətdə və hüquq-mühafizə orqanlarında ciddi narahatlıq doğuran adam oğurluğu hallarına qarşı mübarizənin daha qətiyyətli və məqsədyönlü aparılması üçün belə faktlar üzrə cinayət işləri birləşdirilmiş, Baş Prokurorluğun və Daxili İşlər Nazirliyinin peşəkar əməkdaşlarından ibarət istintaq-əməliyyat qrupu yaradılmışdır. Həmin qrupun keçirdiyi mükəmməl istintaq hərəkətləri və əməliyyat-axtarış tədbirləri nəticəsində 2002-ci ildə əvvəllər törədilmiş və bağlı qalmış bir çox adam oğurluğu cinayətlərinin üstü açılmış, bu cinayətlərin törədilməsində iştirak edən 25 nəfər həbs olunmuş, şəxsiyyətləri müəyyənləşdirilmiş 23 nəfər barəsində isə axtarış elan edilmişdir.

Belə ki, 1994-cü il avqustun 28-də cinayətkar aləmdə “Bülbülə Tahir” ləqəbi ilə tanınan Tahir İbrahimovun qardaşı Hidayət İbrahimov, Akif Rüstəmov, “Roşka” ləqəbli Rövşən Paşayev və qeyrilərindən ibarət banda iş adamı Faiq Ələkbərovu Bakı şəhərindəki ofisində silahlı basqın etməklə oğurlamış, onu 3 gün saxlayaraq hədə-qorxu ilə 182 min ABŞ dolları pulunu almışdır. Keçirilmiş uğurlu əməliyyat-axtarış tədbirləri nəticəsində Rövşən Paşayev tutulmuşdur, digərlərinin isə axtarışı davam etdirilir.

Həmin ilin oktyabrında Hacıqabul şəhər sakinləri “Kokan” ləqəbli Qalib Abbasov, Sədyar Zeynalov və qeyrilərindən ibarət bandanın üzvləri Nəvahi ət kombinatının keçmiş direktoru, Milli Məclisin sabiq deputatı Əli Qurbanovun evinə silahlı basqın etmiş, onun xidməti tapançasını və əmlakını ələ keçirmiş, özünü və oğlu Fikrəti külli miqdarda pul almaq məqsədi ilə oğurlamışlar. İstintaqla müəyyən edilmişdir ki, Qalib Abbasov, həmçinin, 1995-ci ilin noyabrında odlu silah işlətməklə Hacıqabul şəhərində qərəzli xuliqanlıq əməli də törətmişdir. Keçirilmiş əməliyyat-axtarış tədbirləri ilə bu il o, Moskva şəhərində, Sədyar Zeynalov isə Hacıqabul rayonunda tutulmuşlar. Bandanın barələrində həbs-qətimkan tədbiri seçilmiş digər üzvlərinin axtarışı üzrə tədbirlər həyata keçirilir.

Adı yuxarıda çəkilən “Bülbülə Tahir”in yaratdığı cinayətkar dəstə 1995-ci ilin may ayında Bakı çay fabrikinin direktor müavini Rafiq Rəsulovu, oktyabr ayında isə Bakı Yanacaqdoldurma Məntəqələri İdarəsinin müdiri, Bülbülə qəsəbəsinin sakini Mürvət Bayramovu silahlı basqın yolu ilə oğurlayaraq hədə-qorxu gəlməklə külli miqdarda pul tələb etmişdir. Aparılmış istintaq və əməliyyat-axtarış tədbirləri nəticəsində Tahir İbrahimov hələ 2000-ci ilin fevralında, cinayətkar dəstənin digər üzvləri İlqar Bədəlov, Nəsrəddin Məmmədyar oğlu, Rizvan Abdullayev və Firuz Qurbanov isə bu ilin iyul və noyabr aylarında Bakı və Moskva şəhərlərində həbs olunmuşlar.

1996-cı ilin avqustunda Rusiya Federasiyası Dağıstan Respublikasının Dərbənd şəhər sakini Hətəm Hətəmovun sifarişi ilə, 50 min ABŞ dolları müqabilində, dağıstanlılar Abuzər Abuzərov və Allahverdi Babayev Azərbaycan Respublikasının vətəndaşları Qabil Ağayev, Hüseynağa Zərbəliyev, Afər Kərimov, Səyyad Allahverdiyev, “Hökməli Rasim” ləqəbli Rasim Cəbrayılov və qeyrilərindən ibarət silahlı banda təşkil edərək, Bakı şəhərinin sakini Tofiq Bayramovu oğurlamış, əlləri və gözləri bağlı vəziyyətdə Novxanı bağlarında 13 gün saxlayaraq, zərərçəkənin Rusiya Federasiyasında kommersiya fəaliyyəti ilə məşğul olan qardaşından hədə-qorxu ilə 300 min ABŞ dolları tələb etmişlər.

Sonrakı istintaq-əməliyyat tədbirləri nəticəsində həmin bandanın hələ 1995-ci ildə Bakı şəhər sakini Tahir Cəfərovu və İran İslam Respublikasının vətəndaşı Məmmədhüseyn Qaraxanlını da oğurlayaraq külli miqdarda pul tələb etdiyi müəyyən olunmuşdur.

Yüksək peşəkarlıqla həyata keçirilmiş istintaq hərəkətləri və əməliyat-axtarış tədbirləri ilə bandanın yuxarıda adları qeyd edilən üzvləri də həbs olunmuşlar.

1999-cu ilin dekabrında cinayətkar aləmdə “Nardaranlı Bala” ləqəbi ilə tanınan Balaqardaş Dadaşovun və cəzaçəkmə müəssisələrinin birində azadlıqdan məhrumetmə cəzası çəkən Ülfət Xudiyevin təşkil etdikləri silahlı banda tərəfindən “Binə” yarmarkasının sahiblərindən biri, əslən nardaranlı Məmmədmirzə Hüseynovun qardaşı Tofiq oğurlanaraq 14 gün azadlıqdan qanunsuz məhrum edilməklə qohumlarından hədə-qorxu ilə 1,5 milyon ABŞ dolları tələb olunmuşdur.

Həmin bandanın digər üzvləri İlham Həmidov, Rüstəm Qasımov və qeyriləri tərəfindən hələ 1996-cı ilin mayında Moskva şəhərində kommersiya fəaliyyəti ilə məşğul olan Surətdin Talıbovun Bakıda silahlı basqın edilməklə oğurlanması və 40 min ABŞ dolları alındıqdan sonra buraxılması da istintaqa məlum olmuşdur. Bandanın əksər üzvləri ölkəmizin və MDB dövlətlərinin ərazilərində tutularaq həbs olunmuş, Balaqardaş Dadaşov və qeyriləri barəsində isə həbsli axtarış elan edilmişdir.

2000-ci il yanvarın 10-da Keçmiş Aviasiya Nəqliyyatı Prokurorluğunda prokuror köməkçisi işləmiş Ceyhun Kərimovun yaşadığı binanın həyətində odlu silahla hədələnməklə və havaya atəş açılmaqla, başına rezin dəyənək zərbələri endirməklə bir qrup maskalı şəxs tərəfindən oğurlanmasına cəhd göstərilmişdi. Lakin cinayətkarlar iradələrindən asılı olmayan səbəbdən məqsədlərinə çata bilməmişdilər.

Bu cinayəti törətmiş bandanın üzvləri - İlham Kərimov, Tofiq Məmmədhüseynov, Oleq Panteleyev, Pərviz Axundov, Oleq Kaporeyka, Fikrət Əmirov, İlqar Əliyev, Zaur Babayev, Nail və Natiq Bənipaşa qardaşları respublikamızın və Rusiya Federasiyasının ərazilərində aparılmış istintaq-əməliyyat tədbirləri ilə müəyyən edilərək tutulmuş, banda başçısı Laçın Aydınovun və üzvləri - Ramal Mustafayevlə Əli Kərimovun barələrində isə həbsli axtarış elan olunmuşdur.

İstintaq zamanı bu cinayətkar dəstə tərəfindən 2001-ci ilin fevralında Bakı Şəhər Texniki İnventarlaşdırma və Mülkiyyət Hüquqlarının qeydiyyatı İdarəsində özəlləşdirmə şöbəsinin rəisi işləyən Ramil Bayramova da basqın edilməsi, habelə digər vətəndaşların da əmlakının quldurluq yolu ilə talanması faktları aşkar edilmişdir. O da müəyyən olunmuşdur ki, banda üzvləri arasında konkret vəzifə bölgüsü aparılmış, onlar odlu silahlar, qandal, elektroşok qurğusu, maska, rezin dəyənək və sair vasitələr əldə etmiş, həmçinin cinayətkar niyyətlərini həyata keçirmək üçün sahibkarlıqla məşğul olan bir sıra şəxslərin, o cümlədən ayrı-ayrı əcnəbi iş adamlarının siyahısını hazırlamışlar.

Beləliklə, Azərbaycan Respublikasının Prezidenti cənab Heydər Əliyevin dövlətin ali məqsədi olan insan və vətəndaş hüquqlarının etibarlı təmini, hər bir fərdin, o cümlədən sahibkarlıq fəaliyyəti ilə məşğul olan iş adamlarının qanuni mənafelərinin qorunması istiqamətində apardığı fəal hüquq-mühafizə kursunun həyata keçirilməsi 2002-ci ildə də uğurla davam etdirilmiş, cinayətkarlıqla mübarizədə əldə olunmuş müsbət təmayül qorunub saxlanılmışdır.

Respublikanın Baş Prokurorluğu və Daxili İşlər Nazirliyi ölkə ictimaiyyətini əmin edir ki, cinayətkarlığa qarşı bundan sonra da qətiyyətlə mübarizə aparılacaq, törədildiyi vaxtdan asılı olmayaraq hər bir cinayətin açılması və hüquqazidd əməllərə görə cəzanın labüdlüyü prinsipinin yerinə yetirilməsi, asayişin mühafizəsi və vətəndaşların əmin-amanlığı təmin olunacaqdır.

Bu məlumat AZƏRTAC-a respublika Baş Prokurorluğu və Daxili İşlər Nazirliyinin mətbuat xidmətlərindən 2002-ci il dekabrın 30-da daxil olmuşdur.