Bu baxımdan, respublikanın daxili işlər, prokurorluq və digər hüquq- mühafizə orqanları tərəfindən ölkədə asayişin mühafizəsi, baş vermiş ağır və xüsusilə ağır, ictimai əks-səda doğurmuş cinayətlərin açılması, cinayət törədərək istintaqdan yayınanların tapılıb tutulması, silah-sursatın və narkotiklərin qanunsuz dövriyyəsinin qarşısının alınması məqsədi ilə həyata keçirilən əməliyyat-axtarış və istintaq tədbirləri uğurla davam etdirilir.

Əvvəlki illərdə olduğu kimi, 2003-cü ilin ötən dövründə də cinayətlərin açılma göstəriciləri yüksək olmuş, ümumi cinayətlərin sayı azalmış, axtarışda olan 3 minə yaxın cinayətkar müəyyən edilərək tutulmuşdur.

Cari ildə respublikada, xüsusən də Bakıda bir sıra təhlükəli cinayətkar qrup və dəstələr, o cümlədən adam oğurluqları törətmiş Fuad və Miryusif Əliyevlərin; Türkiyə vətəndaşı Bülənd Niyazini qətlə yetirmiş Habil Seyidovun; Bakı şəhər sakini Nina Qeyankinanı və Sumqayıt şəhər sakini Telman Qafarovu qətlə yetirmiş İlham Məmmədov və Azər Quliyevin; Bakı şəhər sakini Kərim Ələkbərovu odlu silahla qətlə yetirmiş Rusiya Federasiyasının vətəndaşı Murad İbrahimovun; Bakının Nizami, Xətai, Sabunçu, Nərimanov, Binəqədi və Nəsimi rayonlarının ərazisində qəsdən adamöldürmə, quldurluq, oğurluq və s. cinayətlər törətmiş Namiq Bünyadovun başçılıq etdikləri cinayətkar dəstələr, ümumiyyətlə isə respublika üzrə qrup halında 600-ə yaxın cinayət törətmiş 1569 cinayətkar zərərsizləşdirilmişdir.

Tamamlanmış cinayət işləri üzrə fiziki və hüquqi şəxslərə vurulmuş 5 milyard manatdan çox maddi ziyanın ödənilməsi təmin olunmuşdur.

Baş vermiş bir sıra ağır və xüsusilə ağır cinayət hadisələri respublika Daxili İşlər Nazirliyinin və Baş Prokurorluğunun birgə həyata keçirdikləri təşkilati-praktik tədbirlər nəticəsində açılmışdır.

Belə ki, yüksək peşəkarlıqla aparılmış əməliyyat-axtarış tədbirləri və istintaq hərəkətləri nəticəsində Abşeron rayonunun Saray qəsəbə sakini Salman Abdullayevi qətlə yetirmiş Namiq Əliyev və Rusiya Federasiyası hüquq-mühafizə orqanları tərəfindən axtarılan Həbib Baxşəliyev tutulmuşlar. Bu cinayətkar qrup tərəfindən Abşeron rayonu və Sumqayıt şəhəri ərazisində 2000-2003-cü illər ərzində daha 2 ölüm, 11 quldurluq, 37 mal-qara və mənzil oğurluğu törədilməsi də müəyyən edilmişdir. Həmin şəxslərdən qanunsuz saxladıqları 1 ədəd “Naqan” tipli tapança, 1 ədəd yivli silah və 2 ov tüfəngi götürülmüşdür.

Bununla yanaşı, xüsusi hazırlanmış birgə tədbirlər nəticəsində Nadir Şıxzadayevin, Gülnaz Babayevanın, Vüqar Dünyamalıyevin, Bəxtiyar Ağayevin və qeyrilərinin daxil olduqları 30 nəfərdən ibarət cinayətkar dəstə ifşa olunmuş, onlardan 18-i tutularaq istintaqa təhvil verilmiş, digərlərinin axtarışı üzrə intensiv iş aparılır. İstintaq və əməliyyat-axtarış tədbirləri zamanı bu təhlükəli cinayətkar dəstə tərəfindən son 2 il ərzində respublikanın Bərdə və Bakı şəhərinin Nəsimi, Nərimanov, Sabunçu, Xətai rayonlarının ərazilərində müxtəlif növ 65 cinayət hadisəsinin törədilməsi, vətəndaşların külli miqdarda əmlakının qarət edilməsi faktları sübuta yetirilmişdir. Həmin cinayətlər arasında 1 qəsdən adamöldürmə, 2 ölümə sui-qəsd, 7 quldurluq, 50-yə yaxın oğurluq və sair ağır cinayətlər vardır. Axtarış zamanı cinayətkarlardan 1 avtomat, 3 tapança, müxtəlif döyüş sursatları, narkotik vasitələr və cinayət yolu ilə əldə etdikləri qiymətli əşyalar götürülmüşdür.

Cari ilin aprel-iyun aylarında Bakı şəhərinin Xətai rayonunun ərazisində Nadir Fərhadova və İran İslam Respublikasının vətəndaşı Pərviz Yusifiyə odlu silahla xəsarət yetirilərək pul tələb olunması, bu rayonda yerləşən mağazaya silahlı basqın nəticəsində gözətçi Şirin Cəfərovu yaralamaqla malların talanması, Binəqədi rayonunda Zemfira Əliyevanın xüsusi amansızlıqla öldürülərək pul və qiymətli əşyaların aparılması cinayətlərinin də üstü açılmışdır. Həmin cinayətləri törədənlərin Rüfət Məmmədov və qeyriləri olması müəyyən edilmişdir və onların məsuliyyətə cəlb olunması istiqamətində tədbirlər davam etdirilir.

Böyük Britaniya və Kanada vətəndaşlarına qarşı quldurluq cinayətləri törətmiş Ramin Səlimov, Stanislav Yakuşev, Ramin Novruzov və Tamerlan Anatağıyevdən, habelə Avstriya vətəndaşlarına qarşı soyğunçuluq cinayətləri törətmiş Pərviz Qulamov, Səbuhi Poladov, Vüqar Əliyev və Samir Həsənovdan ibarət cinayətkar dəstələr həyata keçirilən birgə tədbirlər nəticəsində müəyyən edilib cinayət məsuliyyətinə cəlb olunmuşlar.

İnsan hüquq və azadlıqlarının təmin edilməsi sahəsində mühüm vəzifələrdən biri də cinayətlər nəticəsində zərərçəkmiş şəxslərin pozulmuş hüquqlarının bərpasıdır. Odur ki, keçmiş illərdən bağlı qalmış cinayətlərin açılması işi də daim nəzarətdə saxlanılmışdır. Görülmüş tədbirlər nəticəsində 2001-2002-ci illər ərzində Ağsu, Sabirabad, Saatlı və Kürdəmir rayonları ərazisində Mirnəcəf, Mirnəzim və Mirqəni Rzayev qardaşlarından ibarət çinayətkar qrup tərəfindən 42, eləcə də 2001-2003-cü illərdə Salyan, Hacıqabul, Xaçmaz və Xızı rayonları ərazisində Sərvər və İxtiyar Məmmədov qardaşlarından ibarət cinayətkar qrup tərəfindən 16 mal-qara oğurluğu hadisəsinin törədilməsi müəyyən edilmiş, təqsirkar şəxslər məsuliyyətə cəlb olunmuşlar.

Strateji əhəmiyyət kəsb edən obyektlərin mühafizəsi, yanacaq-sürtkü materiallarının, habelə onları nəql edən kəmərlərin və müvafiq avadanlıqların talanması ilə bağlı baş verən cinayətkar qəsdlərin qarşısının alınması sahəsində görülən işlər xüsusi nəzarət altında davam etdirilmişdir. Cari ilin yanvar-fevral aylarında həyata keçirilmiş tədbirlərlə Binə qəsəbəsi ərazisində Azərbaycan Hava Yolları Dövlət Konserninə məxsus Dübəndi-Bakı ehtiyat neft kəmərinin 2.300 metr uzunluğunda olan hissəsini oğurladıqlarına görə Laçın rayon sakini Mürsəl Salahovun başçılıq etdiyi cinayətkar dəstənin 11 üzvü müəyyən olunaraq həbs edilmişdir. Bu yöndə həyata keçirilən birgə tədbirlərin məntiqi nəticəsi olaraq cari ilin ötən dövrü ərzində həmin növ cinayətlərin sayı kəskin surətdə azalmışdır.

Qeyd olunmalıdır ki, ölkənin maliyyə-iqtisadi əsaslarına ziyan vuran hərəkətlərin qarşısının alınması üzrə görülən məqsədyönlü və xüsusi tədbirlər nəticəsində Rusiyanın ayrı-ayrı bölgələrindən gətirilmiş 878 ədəd saxta 100-lük ABŞ dolları əskinasını respublika vətəndaşlarına satmaq istəyən Bakı şəhər sakinləri Eldar Ələsgərov, Güloğlan Mürsəlov, Nazim Əsədov, Teymur Abbasov, habelə Rusiya Federasiyasının milliyətcə çeçen vətəndaşları Şaxid Mantayev və Xanpaşa İsrapilov, həmçinin Rusiya vətəndaşı Əsli Abdullayeva və Bakı şəhər sakini Çingiz Hacıyevdən ibarət üç cinayətkar qrup zərərsizləşdirilərək cinayət məsuliyyətinə cəlb olunmuşdur. Bundan başqa şəxsiyyət və sürücülük vəsiqələrinin, pasportların və digər sənədlərin, habelə Bakı şəhərində fəaliyyət göstərən ABŞ, Yaponiya, İsveçrə, Səudiyyə Ərəbistanı və sair dövlətlərin banklarının məlumatlarını kompüter vasitəsi ilə əldə etməklə, bu bankların kredit kartlarının və qiymətli kağızlarının saxta nümunələrini hazırlayan, belə ödəniş sənədləri ilə 40-a yaxın mağazadan 28 milyon manatlıqdan çox sənaye malları talamış Rusiya Federasiyasının Çeçenistandan olan vətəndaşı Sultan Musayevin başçılıq etdiyi, Azərbaycan və Gürcüstan vətəndaşlarından ibarət mütəşəkkil cinayətkar dəstə də uğurla başa çatdırılmış əməliyyat-axtarış tədbirləri nəticəsində ifşa edilmişdir. Respublikamızın ictimaiyyəti əmin ola bilər ki, ölkədə həyata keçirilən məqsədyönlü və səmərəli hüquq-mühafizə siyasətinə uyğun surətdə Azərbaycanda kriminogen durumun daim nəzarətdə saxlanılması, cinayətkarlıqla mübarizə və asayişin mühafizəsi, qanunçuluğun və hüquq qaydalarının təmini işi bundan sonra da dönmədən və qətiyyətlə davam etdiriləcəkdir. İctimai sabitlik, əhalinin əmin-amanlığı, vətəndaşların hüquqları və dövlətin mənafeləri üçün təhlükə yaradan hər cür neqativ təzahürlərə, cinayətkar qəsdlərə qarşı ciddi adekvat ölçülər götürüləcək, törədilmiş hər bir hüquqazidd əmələ görə qanunun bütün gücü tətbiq olunacaqdır.