RESPUBLİKA ƏRAZİSİNDƏ “TƏMİZ HAVA” DEVİZİ ALTINDA NÖVBƏTİ TƏHLÜKƏSİZLİK AYLIĞI KEÇİRİLƏCƏKDİR
Bakı Şəhər Dövlət Yol Polisi İdarəsinin şöbə müdiri Vaqif Əsədov AZƏRTAC-a bildirmişdir ki, Azərbaycan Prezidentinin 2004-cü il 11 noyabr və 2006-cı il 28 sentyabr tarixli Sərəncamları ilə təsdiq edilmiş Azərbaycan Respublikasında “Demoqrafiya və əhali sakinliyinin inkişafı sahəsində Dövlət Proqramı”nın və “Azərbaycan Respublikasında ekoloji vəziyyətin yaxşılaşdırılmasına dair 2006-2010-cu illər üçün Kompleks Tədbirlər Planı”nın icrası ilə əlaqədar avqustun 1-dən sentyabrın 1-dək respublika ərazisində, o cümlədən Bakı şəhərində “Təmiz hava” devizi altında təhlükəsizlik aylığı keçiriləcəkdir.
Tədbirlər planına əsasən, avtomobil təsərrüfatı olan müəssisələrdə və yollarda xüsusi cihazlar vasitəsilə avtomobillərin mühərriklərindən çıxan qazların tərkibi yoxlanılacaqdır. Belə ki, avtomobilin mühərrikindən çıxan qazların tərkibində normadan artıq karbon qazının olması aşkarlanarsa sürücülər məsuliyyətə cəlb olunacaqlar.
Sürücülərdən, nəqliyyat vasitələrinin sahiblərindən xahiş olunur ki, idarə etdikləri avtomobilləri texniki sazlığını, karbirator və yanacaq sistemini xüsusi diaqnostika mərkəzlərində yoxlatdıraraq saz vəziyyətə gətirsinlər.
