RƏSSAM ƏYYUB HÜSEYNOVUN YUBİLEY SƏRGİSİ AÇILMIŞDIR
Sərgidə rəssamın təxminən 60 illik fəaliyyətinin məhsulu olan 68 boyakarlıq və qrafika əsəri nümayiş etdirilir.
Mədəniyyət və Turizm Nazirliyinin, Səttar Bəhlulzadə adına Mərkəzi Sərgi Salonunun birgə təşkilatçılığı ilə keçirilən sərgini nazir Əbülfəs Qarayev açaraq mərhum sənətkarımızın həyat və yaradıcılığından danışmışdır. Bildirmişdir ki, Azərbaycan təsviri sənətinin inkişafında xüsusi xidmətləri olan Əyyub Hüseynov yaradıcılıqla yanaşı pedaqoji sahədə də çalışmış, 10 ildən artıq Əzim Əzimzadə adına Rəssamlıq Texnikumuna rəhbərlik etmişdir. Həmin dövrdə burada təhsilini başa vurmuş neçə-neçə məzun bu gün ölkəmizdə tanınmış rəssamlar sırasındadır.
Xalq rəssamları - Rəssamlar İttifaqının sədri Fərhad Xəlilov, Altay Hacıyev yubiley münasibətilə mərhumun ailə üzvlərini təbrik etmişlər. Həyatdan köçmüş rəssamlarımızın yubiley sərgilərinin bayram əhval-ruhiyyəsi şəraitində keçirildiyini vurğulayan natiqlər, Əyyub Hüseynovu gözəl insan, sənətkar, pedaqoq kimi dəyərləndirmişlər.
Rəssamın oğlu Elnur Hüseynov atasının xatirəsinə göstərdikləri diqqət və ehtirama görə tədbirin təşkilatçılarına və iştirakçılarına minnətdarlığını bildirmişdir.
Bölmənin digər xəbərləri
