RUSİYA-AZƏRBAYCAN ƏLAQƏLƏRİ YÜKSƏK QİYMƏTLƏNDİRİLMİŞDİR
Dekabrın 12-də Azərbaycanın xarici işlər naziri Vilayət Quliyev Rusiya Federasiyasının ölkəmizdəki müvəqqəti işlər vəkili Stanislav Çernyavskini qəbul etmişdir.
Xarici İşlər Nazirliyinin mətbuat mərkəzindən AZƏRTAC-a demişlər ki, görüş zamanı müvəqqəti işlər vəkili Stanislav Çernyavski Rusiya ilə Azərbaycan arasında münasibətləri yüksək qiymətləndirərək, əlaqələrin daha da inkişaf etdirilməsinin vacib olduğunu bildirmişdir.
Nazir Vilayət Quliyev iki ölkə arasında əlaqələrin möhkəmlənməsi üçün geniş imkanların mövcudluğunu önə cəkərək, ikitərəfli münasibətlərin perspektivinə əmin olduğunu bildirmişdir.
Daha sonra nazir Vilayət Quliyev Ermənistan-Azərbaycan, Dağlıq Qarabağ münaqişəsinin sülh yolu ilə aradan qaldırılması istiqamətində aparılan işlər barədə qonağa ətraflı məlumat vermiş və Rusiyanın münaqişənin həllində ATƏT-in Minsk qrupu çərçivəsində üzərinə götürdüyü vasitəçilik missiyasında öz səylərini əsirgəməyəcəyinə ümidvar olduğunu qeyd etmişdir.
Görüşdə qarşılıqlı maraq doğuran bir sıra digər məsələlər də müzakirə edilmişdir.
Bölmənin digər xəbərləri
