Rusiya Futbol İttifaqı Azərbaycan millisinin hücumçusu Ramil Şeydayevin şikayətini təmin edib
Bakı, 6 fevral, AZƏRTAC
Rusiya Futbol İttifaqı (RFİ) Azərbaycan milli komandasının hücumçusu Ramil Şeydayevin sabiq klubu “Dinamo”ya qarşı şikayətini təmin edib.
AZƏRTAC xəbər verir ki, qurum Moskvanın “Dinamo” klubunun heyətinə yeni qatdığı futbolçuların qeydiyyatına və meydana çıxmasına qadağa qoyub. Yığmamızın forvardı Ramil Şeydayevin şikayətinə baxan ittifaq rəsmiləri onunla müqavilə şərtlərinə əməl edilmədiyi qənaətinə gəliblər.
RFİ-nin qərarına əsasən, “Dinamo” R.Şeydayev qarşısında müqavilə öhdəliklərini tam yerinə yetirdikdən sonra qadağa aradan götürülə bilər. Bu isə o deməkdir ki, Ramillə vaxtından əvvəl, heç bir səbəb olmadan iş müqaviləsini pozan Moskva klubu ona təzminat ödəməlidir.
Xatırladaq ki, R.Şeydayev “Dinamo” komandasına 2019-cu ilin yayında “Krılya Sovetov”dan azad agent kimi keçib. Moskva klubu 24 yaşlı hücumçu ilə müqaviləni 2020-ci ilin yanvarında pozduğunu açıqlayıb.
Bölmənin digər xəbərləri
