RUSİYA PREZİDENTİ VLADİMİR PUTİNİN BƏYANATI
- Hörmətli xanımlar və cənablar!
İzacə verin, sizi işimizin nəticələri barədə qısa şəkildə məlumatlandıraq. İlk növbədə bir daha bildirmək istəyirəm ki, qonağımızı, bizim üçün əziz qonağı, Azərbaycan Prezidenti Heydər Əliyeviç Əliyevi və Azərbaycan Respublikasının mötəbər nümayəndə heyətini Moskvada görməyimizə ürəkdən şadıq.
Biz Azərbaycan dövləti başçısının indiki səfərini ikitərəfli münasibətlərin inkişafında ciddi mərhələ kimi qiymətləndiririk. Səfərin proqramı çox geniş idi. Bildiyiniz kimi, hələ dünən mənim evimdə qarşılıqlı fəaliyyətimizin əsas məsələləri barədə fikir mübadiləsi aparmaq imkanımız oldu. Əlbəttə, biz təkbətək görüşümüzün xeyli hissəsini Qarabağ münaqişəsinin nizama salınması məsələsinə ayırdıq. Mən bu barədə bir qədər sonra danışacağam. Lakin diqqət mərkəzində heç də təkcə bu problem deyildi. Biz elə bugünkü iki söhbətimizdə də yalnız bu barədə deyil, həm də qarşılıqlı iqtisadi əlaqələrdən, beynəlxalq aləmdə əməkdaşlıqdan, fəaliyyətimizin əlaqələndirilməsindən danışdıq. İqtisadiyyat sahəsində qarşılıqlı əlaqələrimizin istiqamətlərini nəzərdən keçirdik və öncül məsələləri seçdik. Bildiyiniz kimi, energetika - həm neft, həm də qaz sahəsində əməkdaşlıq bu istiqamətlər sırasındadır. Hesab edirik ki, biz heç də təkcə bu sahələrdə deyil, başqa sahələrdə də səmərəli işləyə bilərik. Kənd təsərrüfatının inkişafı sahəsində əməkdaşlıq da buraya daxildir. Azərbaycan həmişə Rusiya bazarının təzə meyvə və tərəvəzlə ənənəvi təchizatçısı olmuşdur və Rusiyanın da Azərbaycana bəzi kənd təsərrüfatı məhsulları göndərmək imkanı var və göndərməyə hazırdır.
Sənaye istehsalı və sənaye kooperasiyası sahəsində istifadə edilməmiş ehtiyatlar çoxdur. Söhbət həm elektroenergetikadan, həm maşınqayırmadan, həm neft kimyasından, həm metallurgiyadan, həm də rabitədən gedir. Biz bütün bu məsələlər üzərində çox ciddi və müfəssəl şəkildə dayandıq və gördüyünüz kimi, bir sıra mühüm sənədlərin imzalanmasına nail olduq. Mən ilk növbədə 2010-cu ilədək dövr üçün iqtisadi əməkdaşlıq haqqında müqaviləni qeyd etmək istərdim. Hökumətlərə müvafiq tapşırıqlar veriləcəkdir. İndi hökumətlərarası komissiya əməli fəaliyyət proqramı üzərində işləyir və razılaşdığımız kimi, komissiyanın növbəti görüşü cari ilin martında Bakıda keçiriləcəkdir.
Hərbi idarələrin əməkdaşlığı qarşılıqlı fəaliyyətin getdikcə daha böyük əhəmiyyət kəsb edən amilinə çevrilir. Bununla əlaqədar mən qəbul edilmiş və Qəbələ radiolokasiya stansiyasının icarəsi haqqında sazişin imzalanması ilə başa çatmış qərarlara görə məmnun olduğumu bildirmək, azərbaycanlı tərəfdaşlarımıza, ilk növbədə Prezidentə təşəkkür etmək istərdim. Hesab edirik ki, bu, sərhəd idarələrimiz arasında getdikcə genişlənən qarşılıqlı fəaliyyətlə yanaşı, mühüm qərardır.
Ən kəskin problemə - Qarabağ probleminə gəldikdə, bu münaqişənin nizama salınmasında ilk növbədə maraqlı olan dövlət kimi Rusiyanın mövqeyini açıqlaya və təsdiqləyə bilərəm. Belə ki, biz istər Azərbaycanla, istərsə də Ermənistanla münasibətlərimizi eyni dərəcədə fəal və hərtərəfli inkişaf etdirmək istəyirik. Məhz buna görə də həmin məsələnin nizama salınmasında maraqlıyıq. Nəzərə çarpdırmaq istəyirəm, Azərbaycan kimi, Rusiya da hesab edir ki, bu məsələnin dincliklə nizama salınmasının heç bir alternativi yoxdur. Odur ki, bu nizamasalmaya “məğlublarsız və qaliblərsiz” prinsipi əsasında nail olmaq lazımdır. Biz buna çalışacağıq və Rusiya istər ikitərəfli danışıqlarımızda, istərsə də ATƏT-in Minsk qrupu çərçivəsində zəruri səylər göstərəcəkdir.
Biz humanitar sahədə əməkdaşlıq barədə də danışdıq. Mən humanitar sahədə əməkdaşlığa diqqət göstərdiyinə, rus dilini dəstəklədiyinə görə Azərbaycan rəhbərliyinə öz minnətdarlığımı bildirmək istəyirəm. Biz kütləvi informasiya vasitələri sahəsində qarşılıqlı əlaqələrimizin dəstəklənməsindən danışdıq. Mən səfər ərəfəsində “İnterfaks - Azərbaycan” nümayəndəliyinin açılmasını böyük məmnuniyyətlə qeyd edə bilərəm.
Sözsüz ki, çoxtərəfli xarakter daşıyan məsələlər, o cümlədən Xəzər dənizinin bölünməsi ilə bağlı məsələlər diqqət mərkəzində olmuşdur. Deməliyəm ki, bu məsələdə nəzərəçarpacaq irəliləyiş vardır və biz belə razılığa gəldik ki, bu istiqamətdə səylərimizi artıracağıq və ən yaxın vaxtlarda bunu müvafiq sənədlərdə əks etdirmək niyyətindəyik.
Bütün bunlarla yanaşı, biz belə razılığa gəldik ki, bu ilin yayında qeyri-formal görüş keçirək və mən ümid edirəm ki, Heydər Əliyeviç bizim dəvətimizi qəbul edəcəkdir. Mən belə başa düşdüm ki, o, bu məsələyə müsbət münasibətini bildirdi. Zənnimcə, yayın əvvəlində əlamətdar bir hadisə ilə əlaqədar, Sankt-Peterburqda Nizaminin abidəsinin açılışı münasibətilə görüşəcəyik. Mən Peterburq şəhərinin qubernatoru ilə bu barədə danışmışam. Şəhər hökuməti bu tədbirə hazırdır və ümidvaram ki, bu, qarşılıqlı münasibətlərimizlə əlaqədar digər mühüm məsələləri müzakirə etmək üçün yaxşı imkan olacaqdır.
Diqqətinizə görə çox sağ olun.
Bölmənin digər xəbərləri
