RUSİYADA TİCARƏTLƏ MƏŞĞUL OLAN VƏTƏNDAŞLARIMIZIN PROBLEMLƏRİ AZƏRBAYCAN HÖKUMƏTİNİN DİQQƏT MƏRKƏZİNDƏDİR
Səfər çərçivəsində Rusiyanın səhiyyə və sosial inkişaf naziri Mixail Zurabov, Federal Miqrasiya Xidmətinin direktoru Konstantin Romodanovski, onun birinci müavini Vyaçeslav Postavnin, Beynəlxalq Əmək Təşkilatının regional ofisinin rəhbəri Verner Blenklə görüşlər keçirilmişdir.
Danışıqlar zamanı, son 10 ildən artıq bir müddətdə səmimi dostluq və qardaşlıq münasibətləri əsasında daim inkişafda olan Rusiya-Azərbaycan münasibətlərini önə çəkən Rusiya rəsmiləri Federasiya ərazisində işləyən vətəndaşlarının əmək fəaliyyətinin hüquqi əsaslar üzərində qurulmasına MDB-yə üzv dövlətlər arasından ilk olaraq Azərbaycan rəhbərliyinin diqqət yetirməsini xüsusi vurğulamış, vətəndaşlarının əmək fəaliyyətinin leqallaşdırılması prosesinə Azərbaycan hökumətinin kömək təşəbbüslərini yüksək qiymətləndirmişlər. Rusiya tərəfi bu ölkənin iqtisadiyyatının inkişafında Azərbaycan miqrantlarının xüsusi rolu olduğunu qeyd edərək Füzuli Ələkbərova bildirmişlər ki, Azərbaycan vətəndaşlarının əmək fəaliyyətlərinin leqallaşdırılması ilə bağlı problemlərin həllinə Rusiyanın Səhiyyə və Sosial İnkişaf Nazirliyi və Federal Miqrasiya Xidməti tərəfindən xüsusi diqqət yetiriləcəkdir.
Bu sahədəki işlərin Azərbaycan tərəfi ilə əlaqəli şəkildə həyata keçirilməsi, həmçinin yarana biləcək problemlərin operativ həllini təmin etmək məqsədi ilə F.Ələkbərovla M.Zurabov arasında görüşdə qısa müddət ərzində cari fəaliyyət planının hazırlanması qərara alınmışdır. Federal Miqrasiya Xidmətində aparılmış danışıqlar nəticəsində əldə edilmiş razılığa əsasən Azərbaycan vətəndaşlarının üzləşə biləcəkləri problemlərin həlli ilə bağlı birgə tədbirlərin görülməsi üçün Ümumrusiya Azərbaycan Konqresinin nümayəndəsi Azərbaycan tərəfinin əlaqələndirici nümayəndəsi müəyyənləşdirilmiş və Federal Miqrasiya Xidmətinin rəhbərliyinə təqdim olunmuşdur.
Rusiya rəsmiləri tərəfindən bildirilmişdir ki, Azərbaycan vətəndaşlarının Federasiyanın ərazisində əmək fəaliyyətinin leqallaşdırılması işi uğurla həyata keçirilərsə, əlavə olaraq Azərbaycan vətəndaşlarının Rusiya əmək bazarında iştirakı üçün imkanlar genişləndiriləcək, onların sosial təminatı, əmək, tibbi və təhsil ilə bağlı məsələlərinə xüsusi yanaşmalar tətbiq ediləcəkdir.
Əmək və Əhalinin Sosial Müdafiəsi Nazirliyi tərəfindən hazırlanmış “Azərbaycan Respublikası hökuməti ilə Rusiya Federasiyası hökuməti arasında əmək miqrasiyası sahəsində əməkdaşlıq haqqında saziş”in layihəsi tərəflərin aidiyyətli dövlət orqanlarının - Azərbaycan tərəfdən Əmək və Əhalinin Sosial Müdafiəsi, Daxili İşlər, Ədliyyə və Xarişi İşlər nazirliklərinin, həmçinin ölkəmizin Rusiyadakı səfirliyinin və Ümumrusiya Azərbaycan Konqresinin, Rusiya tərəfdən isə Səhiyyə və Sosial İnkişaf, Xarici İşlər və Daxili İşlər nazirliklərinin, eləcə də Federal Miqrasiya Xidmətinin ekspertləri ilə müzakirə edilmiş və Rusiya Federasiyasının bu sahədəki qanunvericiliyinin yeni müddəaları da nəzərə alınaraq təkmilləşdirilmişdir.
Rusiya ərazisində pərakəndə ticarət sahəsində işləyən Azərbaycan vətəndaşlarının rastlaşa biləcəkləri problemlərin həlli ilə əlaqədar Füzuli Ələkbərovun Azərbaycanın bu ölkədəki səfiri Polad Bülbüloğlu, Ümumrusiya Azərbaycan Konqresinin (ÜAK) sədri Məmməd Əliyev və ÜAK-ın rəyasət heyətinin üzvləri ilə görüşləri olmuş və birgə məsləhətləşmələr aparılmışdır.
İştirakçılar Rusiya hökumətinin əcnəbilərin pərakəndə ticarət sahəsində işləmələrinin məhdudlaşdırılması ilə bağlı qərarının icrasına məsul olan aidiyyətli dövlət orqanlarının rəhbərləri ilə keçirilən görüşlər nəticəsində yaradılmış yeni imkanların qarşıda duran vəzifələrin daha səmərəli şəkildə həyata keçirilməsində çox böyük əhəmiyyəti olacağını qeyd etmişlər.
Səfər zamanı Azərbaycan nümayəndə heyəti MDB iştirakçı dövlətlərinin Əmək, Miqrasiya və Əhalinin Sosial Müdafiəsi Məsələləri üzrə Məsləhət Şurasının 19-cu iclasında iştirak etmiş və bu sahələr üzrə ölkəmizin maraqları nəzərə alınmaqla müvafiq protokol imzalanmışdır.
Bölmənin digər xəbərləri
