Rusiyalı mütəxəssislər azərbaycanlı həkimlər üçün kurslar təşkil edəcəklər
Bakı, 20 iyun (AzərTAC). Rusiya Federasiyasının Diplomdan sonrakı Tibb Akademiyasının professor-müəllim heyəti tərəfindən oktyabr-noyabr aylarında Bakıda şüa diaqnostikası, pediatriya və səhiyyənin idarəedilməsi üzrə kurslar təşkil olunacaqdır.
Səhiyyə Nazirliyinin mətbuat xidmətindən AZƏRTAC-a bildirmişlər ki, kurslarda Azərbaycanın dövlət xəstəxana və tibb mərkəzlərində çalışan, ən azı öz ixtisası üzrə 3-5 il iş təcrübəsi olan, rus dilini yaxşı bilən mütəxəssislər iştirak edə bilərlər. Bunun üçün tibb işçiləri avqustun 1-i nazirliyə (245 nömrəli otaq) müraciət etməlidirlər.
Kurslar Azərbaycan Respublikasının Səhiyyə Nazirliyi ilə Rusiya Federasiyasının Diplomdan sonrakı Tibb Akademiyası arasında imzalanmış sazişə əsasən keçirilir.
Bölmənin digər xəbərləri
