Saatlı rayon sakininin evində odlu silah aşkarlanıb
Bakı, 22 may, AZƏRTAC
Saatlı rayonunun Naharlı kənd sakininin odlu silah saxlaması barədə polisə məlumat daxil olub.
Daxili İşlər Nazirliyinin (DİN) mətbuat xidmətindən AZƏRTAC-a bildiriblər ki, Saatlı Rayon Polis Şöbəsinin əməkdaşları tərəfindən məlumatın yoxlanılması məqsədilə Naharlı kənd sakini, əvvəllər məhkum olunmuş Zəkəray Xanalıyevin yaşadığı evdə əməliyyat-axtarış tədbirləri həyata keçirilib. Otaqların birində məişət əşyalarının və təsərrüfat alətlərinin saxlandığı qədim sandıqdan kustar üsulla hazırlanmış “Revolver” tipli tapança, bir səs tapançası, 22 patron və ov tüfənginə aid 35 boş giliz aşkar edilib.
Götürülmüş maddi sübutlar polis əməkdaşları tərəfindən ekspertizaya təqdim olunub.
Faktla bağlı Saatlı Rayon Polis Şöbəsində araşdırma aparılır.
Bölmənin digər xəbərləri
