Sabirabadlı fermer pambıqçılıqda innovativ üsulla 680 ton məhsul əldə edib
Sabirabad, 13 yanvar, Aydın Yavərzadə, AZƏRTAC
Aqrar sektora dövlət tərəfindən göstərilən qayğı nəticəsində fermerlərin bu sahəyə marağı günbəgün artır. Artıq əkinçilikdə innovativ üsullara üstünlük verən fermerlər əziyyətlərinin bəhrəsini də görürlər. Belə fermerlərdən biri də sabirabadlı Əfras Əsgərovdur. O, pambıq əkini zamanı həyata keçirdiyi yenilik hesabına gözlədiyindən də çox - 680 ton “ağ qızıl” tədarük edib.
AZƏRTAC xəbər verir ki, fermer Əfras Əsgərov çiyid səpini Çin texnologiyasına uyğun qoşa cərgə üsulu ilə aparıb. Əfras Əsgərovun sözlərinə görə, hələ əkin aparmamışdan qabaq Kənd Təsərrüfatı Nazirliyinin əməkdaşları Ucarda fermerlərə bu üsulun üstünlüklərini nümayiş etdirib və o da öz sahəsində Çin texnologiyasının tətbiqinə qərar verib. Bu üsulla aparılan əkində hektar payına düşən pambıq kolunun sayı iki dəfə çox olur. Görülən iş sayəsində isə məhsuldarlıq artır. Bu məqsədlə səpin aqreqatında dəyişiklik etməyi qərara alan fermer bir neçə əlavə etməklə Çin texnologiyası ilə səpin aparacaq aqreqat ərsəyə gətirib. Bu aqreqat digərlərindən fərqli olaraq səpini qoşa cərgə ilə aparır.
Ərsəyə gətirilən aqreqatla lifli və lifsiz toxumlar əkmək mümkün olduğu üçün fermerin işi daha da asanlaşıb.
Əfras Əsgərov bildirib ki, ölkəmizdə təsərrüfat sahiblərinə əkin-biçin işləri üçün edilən güzəştlər, həmçinin məhsula görə verilən subsidiyalar digər sahələrdə olduğu kimi, pambıqçılıqda da dönüş yaradıb. Artıq beş ildir ki, pambıq əkini ilə məşğul olan sabirabadlı fermer hər ötən il pambıq tarlalarının sahəsini genişləndirir.
O, əldə etdiyi yüksək nailiyyətlərə görə I dərəcəli “Əmək ordeni” ilə təltif olunub.
Keçən il 150 hektar sahədə pambıq becərən Əfras Əsgərov əməyinin qiymətləndirilməsinə görə Prezident İlham Əliyevə təşəkkürünü bildirib. “Bu kimi təltiflər biz fermerləri kənd təsərrüfatına daha yaxın olmağa sövq edir. Əlbəttə ki, bu, Prezidentimizin kənd təsərrüfatına göstərdiyi qayğının təzahürüdür. Biz fermerlər də çalışırıq ki, üzərimizə düşən vəzifəni daha layiqli yerinə yetirək. Bu məqsədlə ötən il pambıqçılıqda yenilik edərək, 108 hektar sahədə qoşa cərgə üsulu ilə əkin apardım. Bu üsulla ilk dəfə pambıq əksəm də, nəticə gözəl oldu. Bəzi yerlərdə 62, bəzi yerlərdə 45-50 sentner olmaqla, ümumilikdə, 150 hektar sahədən 680 ton məhsul götürdüm. Orta hesabla hektara 45 sentner məhsuldarlıq düşdü. İlk dəfə tətbiq etməyimə baxmayaraq, bu üsul hesabına hər hektara məhsuldarlıq 15 sentner artdı. Təbii ki, gördüyümüz işlərdə dövlət də hər zaman bizi dəstəkləyir. Tədarük etdiyimiz məhsulun ödənişini vaxtında alırıq, əlavə olaraq subsidiya ödənişi, gübrələrin güzəştli şərtlərlə verilməsi, eyni zamanda, müasir texnikalardan istifadə bu sahənin inkişafına güclü təkan verir”.
Sabirabadlı fermer həmkarlarını qoşa cərgə üsulunu tətbiq etməyə səsləyərək, bununla məhsuldarlığın daha da artacağını söyləyir.
“Hazırda şum işlərini yekunlaşdırmaq üzrəyik. Kəndimizdən olan digər fermerlər də yeni üsula üstünlük verirlər. Bu məqsədlə aqreqatların sayını artırmağı planlaşdırırıq”, - deyə o qeyd edib.
Sabirabad Dövlət Aqrar İnkişaf Mərkəzinin direktor müavini Miradil Əhmədli ilə söhbət zamanı bildirib ki, rayon üzrə hər il pambıq tarlalarının sahəsində, həmçinin məhsul artımında ciddi artım müşahidə edilir. Belə ki, 2019-cu ildə rayon üzrə 8630 hektar pambıq sahəsindən 25 min ton məhsul yığılmışdısa, 2020-ci ildə 10 min hektar pambıq tarlasından 31 min ton 600 kiloqram məhsul tədarük edilib. Bu da hər hektara 2,6 sentner artıq olmaqla, 31,6 sentner məhsul deməkdir. Ümumilikdə isə bir il ərzində rayon üzrə 6 min ton artıq məhsul yığılmasına bərabərdir. Cari ildə də pambıq sahələrinin 10 min hektarın üzərində olması planlaşdırılır. Hazırda rayon üzrə qış şumu yekunlaşmaq üzrədir və 7 min fermer təsərrüfatı ilə müqavilələr bağlanılıb.
Bölmənin digər xəbərləri
